Umferðin um Víkurskarðið litlu minni en um Hvalfjörð fyrir gerð Hvalfjarðarganga 1998

10,3% umferðaraukning um Víkurskarð í september

0
218

Umferðin yfir Víkurskarð jókst um 10,3% í nýliðnum mánuði borið saman við sama mánuð á síðasta ári. Þetta er rétt tæplega tvöföld meðaltalsaukning í september milli áranna 1998 – 2016. Umferðin í nýliðnum mánuði var samt. 2.314 (ökut/sólarhring). Með hóflegri aukningu, frá 4 – 5%, í þeim mánuðum sem eftir eru af árinu 2017 verður meðalumferðin (ÁDU) yfir skarðið 1.800 (ökut/sólarhring). Þetta kemur fram í tölum frá Vegagerðinni.

Athyglisvert er að meðalumferðin um Hvalfjörð var rétt rúmlega 1800 (ökut/sólarhring) síðasta heila árið fyrir opnum Hvalfjarðarganga.

Umferðartalning var framkvæmd í Hvalfirði árið 1997, árið áður en Hvalfjarðargöng opnuðu. Talið var í 356 daga nálægt Hvalfjarðarbotni og það er því marktækasta mælingin sem til er fyrir opnun Hvalfjarðarganga. ÁDU umferðin reyndist vera 1866 bílar á sólarhring, sem er litlu meiri en ÁDU um Vkurskarðið stefnir í að vera á þessu ári.

Árið í ár er síðasta árið sem Víkurskarðið er aðalleið milli Þingeyjarsýslu og Eyjafjarðar og er því vel samanburðarhæft við mælinguna í Hvalfirði árið 1997.

Hvalfjarðargöng voru opnuð í júlí árið 1998 og fyrsta heila árið eftir opnun Hvalfjarðarganga var ÁDU umferðin 2.815 bílar um göngin og má því segja að umferðin hafi aukist um næstum 1000 bíla á dag miðað við mælingunum árið 1997 í Hvalfirði. Líklegt er að megnið af umferðinni um Hvalfjörð hafi færst í göngin.
Umferðin hefur aukist mikið um Hvalfjarðargöng frá því að þau voru opnuð og ÁDU fyrir árið 2017 stefnir í að verða um 6.900 bílar á sólarhring, sem er rúmlega 4.000 bíla aukning síðan 1999.
Vaðlaheiðargöng verða opnuð á næsta ári og flest bendir til þess að mest öll umferð um Víkurskarðið færist í Vaðlaheiðargöng og trúlega næstum öll umferðin yfir vetrarmánuðina.
Afar athyglisvert verður að fylgjast með umferðarþróun um Vaðlaheiðargöng fyrsta heila árið eftir opnun þeirra.