Síðari úthlutun úr Uppbyggingarsjóði 2015 á starfssvæði AÞ

0
60

Uppbyggingarsjóður Norðurlands eystra úthlutaði í síðustu viku 10 milljónum kr. í styrkvilyrði til atvinnuþróunar og nýsköpunarverkefna á starfssvæði AÞ. Þetta var síðari úthlutun ársins 2015, en áður var úthlutað í júní sl. Tólf umsóknir bárust en fimm verkefni hlutu styrkvilyrði. Eftirtalin verkefni hlutu styrki í þessari úthlutun:

Forsvarsmenn verkefna sem hlutu styrkvilyrði úr Uppbyggingarsjóði Norðurlands eystra í október 2015 F.v.: Hlöðver P. Hlöðversson, Guðrún Tryggvadóttir, Arnheiður Rán Almarsdóttir, Gunnar Jóhannesson, Hermann Bárðarson, Þórhallur Bjarnason og Jóhann Þórhallsson.
Forsvarsmenn verkefna sem hlutu styrkvilyrði úr Uppbyggingarsjóði Norðurlands eystra í október 2015 F.v.: Hlöðver P. Hlöðversson, Guðrún Tryggvadóttir, Arnheiður Rán Almarsdóttir, Gunnar Jóhannesson, Hermann Bárðarson, Þórhallur Bjarnason og Jóhann Þórhallsson.

Austurgátt / Fly Europe hlýtur kr.3.500.000 styrkvilyrði. Verkefnið lýtur að millilandaflugi milli Egilsstaða og London sem hefst í vor á vegum Discover the World í samstarfi við Tanni Travel og Fjallasýn Rúnars Óskarssonar ehf. sem er umsækjandi. Markmiðið er að stuðla að millilandaflugi um aðra flugvelli en Keflavík á ársgrundvelli í framtíðinni og efla þannig ferðaþjónustu og atvinnuuppbyggingu á Norðausturlandi.

Proteinmjöl úr jarðhita hlýtur kr. 3.000.000 styrkvilyrði. Verkefnið felst í að þróa aðferð til að vinna próteinríkt fóðurmjöl úr kolefnisútblæstri frá jarðhitavirkjunum. Umsækjandi er nýsköpunarfyrirtækið Geo-Protein ehf., sem í samstarfi við Landsvirkjun undirbýr og kannar hagkvæmni á uppsetningu tilraunaverksmiðju við Kröfluvirkjun.

Heimaslóð hlýtur kr. 1.500.000 styrkvilyrði. Heimaslóð er tímabundið átaksverkefni um að efla búskap og stuðla að jákvæðri þróun í landbúnaði í Þingeyjarsýslu. Umsækjandi er BSSÞ í samstarfi við BSNÞ, búgreinasamtök í Þingeyjarsýslu, Sparisjóð Suður-Þingeyinga, RML og AÞ.

Twin town bird festival: Vardö-Húsavík hlýtur kr. 1.000.000 styrkvilyrði. Verkefnið snýst um að efna til fuglahátíðar á Húsavík í beinu framhaldi af fuglahátíðinni Gullfest í Varanger í Noregi. Að verkefninu stendur Fuglastígur á Norðausturlandi í samstarfi við Biotope, forsvarsmenn Gullfest og Norðurþing. Markmiðið er að styrkja ímynd Norðausturlands sem fuglaskoðunarsvæði á heimsvísu.

Mýsköpun: Markaðssetning og kynningarátak erlendis hlýtur kr. 1.000.000 styrkvilyrði. Mýsköpun vinnur að því að koma upp þörungaverksmiðju í Mývatnssveit og felst þetta verkefni í því að koma á tengslum við stofnanir og fyrirtæki erlendis sem eru framarlega á því sviði.

Sem fyrr segir bárust tólf umsóknir nú og sótt var um tæplega 27 milljónir til verkefna með áætlaðan heildarkostnað um 67 milljónir, en til ráðstöfunar voru 10 milljónir.

Fyrri úthlutun Uppbyggingarsjóðs 2015 fór fram 26. júní sl. og var þá úthlutað alls 74,2 milljónum til menningar, atvinnuþróunar og nýsköpunar á starfssvæði Eyþings. atthing.is