Leitað að fé á Miðfjarðarheiði

0
187

Reimar Sigurjónsson sauðfjárbóndi á Felli í Bakkafirði hefur áhyggjur á kindum sem ekki var búið að smala á Miðfjarðarheiði í Norður-Þingeyjarsýslu. Hann fór á fjórhjóli í dag upp á Miðfjarðarheiði, Hágangaurð og Staðarheiði til þess að athuga með féð sem hann hafði áhyggjur af.  Hann fann 60-70 kindur á svæðinu en gat ekki rekið þær heim á leið því öll vatnsföll eru full af snjó og krapa. Kindurnar komust því hvergi.

Þessar kindur voru við Hölkná. Reimar reyndi að reka þær heim á leið en gafst upp við það því öll vatnsföll eru full af krapa. Mynd: Reimar Sigurjónsson
Þessar kindur voru við Hölkná. Reimar reyndi að reka þær heim á leið en gafst upp við það því öll vatnsföll eru full af krapa. Mynd: Reimar Sigurjónsson.

Að sögn Reimars eru venjulega 100-200 kindur á þessu svæði og hafði hann miklar áhyggjur af því að einhverjar þeirra hefðu harkist undan óveðrinu um sl. helgi í ár eða læki á svæðinu og drepist. Ekki fann Reimar þó neinar dauðar kindur í dag enda svæðið stórt og hann var einn á ferð. Nokkuð mikill snjór er á heiðunum og samkvæmt veðurspá er ekki nein hlýindi í kortunum næstu daga.

Að sögn Reimars er ekki búið að ákveða hvenær svæðið verður smalað en það þyrfti að gerast sem fyrst,  sagði Reimar Sigurjónsson í spjalli við 641.is í kvöld.

 

Þessar kindur voru við Djúpavatn. Mynd: Reimar Sigurjónsson
Þessar kindur voru við Djúpavatn. Mynd: Reimar Sigurjónsson
Þessar kindur höfðu leitað skjóls við stóran stein. Mynd: Reimar Sigurjónsson.
Þessar kindur höfðu leitað skjóls við stóran stein. Mynd: Reimar Sigurjónsson.