Landvernd ítrekar kröfu um nýtt umhverfismat Bakkalínu – Þungar áhyggju yfir stöðunni hjá Norðurþingi

0
53

Land­vernd sendi í gærmorgun frá sér til­kynn­ingu þar sem ít­rekuð er fyrri afstaða fé­lags­ins um að um­hverf­is­meta beri fleiri val­kosti en loftlínu frá Kröflu að Bakka svo draga megi úr um­hverf­isáhrif­um. Tilkynningin kemur í kjölfar yfirlýsingu Landsnets um að hugsa þurfi til framtíðar við lagningu raflína að Bakka.

Hólasandur - Tölvugerð mynd
Hólasandur – Tölvugerð mynd

Þar segir að skoða þufi bæði jarðstrengi og loftlínur og valkosti sem sneiða hjá verðmætum hraunum eins og Leirhnjúkshrauni og Þeistareykjahrauni, en framkvæmdir Landsnets hf. hafa nú verið stöðvaðar til bráðabirgða á þessum svæðum vegna náttúruverndarsjónarmiða. Núverandi umhverfismat er úrelt og tekur ekki til slíkra valkosta. Aðeins með nýju umhverfismati fæst raunhæfur samanburður um hvaða leiðir valda minnstum umhverfisáhrifum. Nýtt umhverfismat er því grundvallarkrafa.

Landvernd hafnar því að reist verði loftlína sem flutt geti tífalda raforkuþörf kísilmálmverksmiðju PCC á Bakka. Þó svo að verksmiðjan kunni að tvöfaldast í ófyrirséðri framtíð, réttlætir það ekki svo stóra línu og minni línur duga, eins og útreikningar Landsnets hf. sýna í fréttatilkynningu fyrirtækisins. Ekki þætti það góður búmaður sem reisir fjós fyrir tífalt fleiri kýr en hann hyggst ala, jafnvel þó svo að hann hyggist fjölga þeim um helming í nánustu framtíð. Landvernd hafnar því að Landsnet hafi sjálfdæmi um ákvarðanir sem þessar. Almenningi þarf að hleypa að málum og það verður best gert með nýju umhverfismati. (landvernd.is)

Norðurþing – Þungar áhyggjur yfir þeirri stöðu sem upp er komin varðandi framkvæmdir við Þeistareykjalínu 1

„Sveitarfélagið Norðurþing lýsir þungum áhyggjum yfir þeirri stöðu sem upp er komin varðandi framkvæmdir við Þeistareykjalínu 1, sem ætlað er að flytja orku til iðnaðarsvæðisins á Bakka. Öll hönnun svæðisins og uppbygging innviða hefur miðað að því að á næstu árum byggist þar upp iðnaðarsvæði með nokkrum fyrirtækjum sem nýta muni orku og línumannvirki svæðisins. Frá upphafi hefur verið litið á fyrri áfanga kísilvers PCC BakkiSilicon sem einungis fyrsta áfanga í þeirri uppbyggingu. Mjög miklir samfélagslegir og fjárhagslegir hagsmunir eru undir í því að niðurstaða fáist í málið á allra næstu dögum.“ Segir í yfirlýsingu frá oddvitum allra sveitarstjórnarflokka í Norðurþingi.