Landsamtök Sauðfjárbænda – Besta ár í lambakjötssölu frá hruni

Erlendir ferðamenn að komast á bragðið

0
260

Innanlandssalan 2016 var 5,2% meiri en árið á undan. Viðsnúningur eftir þriggja ára samdrátt.   Markaðssetning til ferðamanna skilar ótvíræðum árangri segir formaður sauðfjárbænda. Íslendingar gera sér betur grein fyrir gæðum, hollustu og hreinleika. Frá þessu segir í fréttabréfi Landsamtaka Sauðfjárbænda í dag.

Lambakjötið hreint af erfðabreyttu fóðri, hormónum og vaxtahvetjandi lyfjum

Innanlandssala á lambakjöti var 5,2% meiri 2016 en árið á undan samkvæmt nýjum tölum Matvælastofnunnar. Alls seldust 6.797 tonn innanlands í fyrra en salan hefur ekki verið meiri síðan hrunárið 2008. Samdráttur var í sölunni í þrjú ár þar á undan. Sjá nánar í meðfylgjandi töflu.

Erlendir ferðamenn að komast á bragðið
Þórarinn Ingi Pétursson, formaður Landssamtaka sauðfjárbænda fagnar þessum viðsnúningi en bendir á að þetta gerist ekki af sjálfu sér. Margir samverkandi þættir hafi stuðlað að þessum góða árangri. Verð á lambakjöti sé mjög hagstætt hér á landi og vöruþróun að komast á skrið. „Aldrei hefur verið ráðist í öflugra og markvissara kynningarstarf gagnvart erlendum ferðamönnum en núna og árangurinn af því er ótvíræður.“ Þá séu Íslendingar að verða ennþá betur meðvitaðir um mikilvægi þess að matvara sé framleidd á hreinan og siðrænan hátt í sátt við samfélag og náttúru. „Íslenska lambakjötið er laust við erfðabreytt fóður, hormóna eða vaxtahvetjandi lyf og bragðgæðin eru ótvíræð.“

Neytendur og bændur standa saman með þjóðarréttinum
„Þetta er jákvætt að þetta gerist á sama tíma og við erum að horfa upp á vandræði á sumum erlendum mörkuðum fyrir aukaafurðir og ódýrari bita vegna viðskiptadeilu Rússlands og Vesturveldanna“ segir Þórarinn Ingi. Sauðfjárbændur hafa þegar tekið á sig 600 milljóna króna skell vegna þessara utanaðkomandi áhrifa með afurðaverðlækkun í haust. „ Íslenskir neytendur standa greinilega með sauðfjárbændum þegar kreppir að“ segir Þórarinn „sem er í sjálfu sér ekki skrítið því hagsmunir beggja fara saman.“