Kröfugerð Framsýnar lögð fram

0
53

Telja langtímasamning ekki koma til greina miðað við núverandi aðstæður-

Framsýn, stéttarfélag hefur síðustu mánuði unnið að mótun kröfugerðar vegna komandi kjaraviðræðna við atvinnurekendur. Félagið hefur haldið félagsfundi um kjaramál og vinnustaðafundi þar sem kjaramál hafa verið til umræðu.

1317204445-framsyn

Þá hefur félagið einnig ályktað um kjaramál þar sem stefnu félagsins hefur verið komið á framfæri út í samfélagið. Gengið var frá endanlegri kröfugerð félagsins í gær, miðvikudaginn 11. september. Framsýn er aðili að þremur landssamböndum, Starfsgreinasambandi Íslands, Sjómannasambandi Íslands og Landssambandi ísl, verslunarmanna. Framsýn hefur ákveðið að fela samböndunum samningsumboð félagsins í komandi viðræðum við atvinnurekendur.

„Algjör einhugur er innan félagsins að ekki komi til greina að gera kjarasamning til lengri tíma miðað við núverandi aðstæður þar sem fjárlagafrumvarpið er ekki komið fram og ný ríkistjórn hefur ekki viljað gefa upp hvað hún hyggst gera í efnahagsmálum. Í ljósi þessa telur félagið að fleyta eigi núverandi kjarasamningum áfram um 6 til 8 mánuði. Á móti komi launahækkun til félagsmanna þann 1. desember 2013, þegar núverandi kjarasamningar renna út. Hækkanirnar taki mið af verðbólgu- og launaþróun á árunum 2012-13.“

Húsavík 12. september 2013

Sjá má aðrar kröfur félagsins sem eru í nokkrum liðum inn á heimasíðu félagsins, www.framsyn.is