Holuhraun mun heita Holuhraun

0
52

Nýja hraunið sem myndaðist í eldgosinu í Holuhrauni í fyrra skal heita Holuhraun. Þetta var ákveðið á sveitarstjórnarfundi í Skútustaðahreppi í morgun. Á fundinum voru greidd atkvæði um fjórar tillögur og hlaut nafnið Holuhraun tvö atkvæði, Urðarbruni eitt og Nornahraun eitt. Því var ákveðið að hraunið skyldi heita Holuhraun. Frá þessu segir á rúv.is í dag.

Holuhraun

Í haust skipaði sveitarstjórnin fimm manna nefnd um nafngiftina. Í henni sátu tveir fulltrúar Skútustaðahrepps, ásamt fulltrúum Jarðvísindastofnunar Háskóla Íslands, Vatnajökulsþjóðgarðs og nafnfræðisviðs Stofnunar Árna Magnússonar. Nefndin sendi inn fjórar tillögur að nafni á hraunið inn til Örnefnanefndar. Það voru, auk Holuhrauns, nöfnin Urðarbruni, Nornahraun og Flæðahraun. Örnefnanefnd veitti umsagnir um nöfnin og mælti með því að hraunið yrði kallað Holuhraun en gegn því að það yrði kallað Nornahraun. Nefndin gerði ekki athugasemd við nöfnin Urðarbruni og Flæðahraun.

rúv.is