Jón Gunnarsson bóndi í Árholti á Tjörnesi er um þessar mundir að byggja myndarlegt fjárhús á jörðinni. Aðeins norðar eða í Lóni í Kelduhverfi eru einnig stórhuga bændur að byggja nýtt fjárhús. Það eru hjónin Einar Ófeigur Björnsson og Guðríður Baldvinsdóttir. Jón í Árholti á fyrir gamalt fjárhús sem hann mun nota áfram, ekki síst á vorin í sauðburði. Frá þessu er sagt á vef Framsýnar-stéttarfélags.
Nýja fjárhúsið kemur til með að hýsa um 360 kindur. Fjárhúsið verður að sjálfsögðu fullkomið með ýmsum nýungum. Það er Trésmiðjan Rein sem reisir húsið. Reiknað er með að húsið verði fokhelt í haust. Við óskum Jóni að sjálfsögðu til hamingju með þennan merka áfanga.
