Átakafundi lokið hjá Framsýn

0
72

Fundi stjórnar og trúnaðarmannaráðs Framsýnar var að ljúka. Hörð gagnrýni kom fram á fundinum með vinnubrögð formanns Starfsgreinasambands Íslands, Björns Snæbjörnssonar. Forsendan fyrir viðunandi kjarasamningi sé að félögin standi saman að gerð kjarasamnings. Í lok fundarins var svohljóðandi ályktun samþykkt samhljóða.

Frá fundinum í kvöld. Mynd af vef Framsýnar.
Frá fundinum í kvöld. Mynd af vef Framsýnar.

„Stjórn og trúnaðarmannaráð Framsýnar fordæmir vinnubrögð formanns Starfsgreinasambands Íslands sem síðustu daga hefur unnið markvisst að því að splundra einingu aðildarfélaga sambandsins til sóknar í kjaramálum. Það er sorglegt að á sama tíma og opinberir starfsmenn standa fyrir glæsilegum baráttufundum til að efla samstöðuna skuli formaður Starfsgreinasambandsins telja tíma sínum best varið í að stía  aðildarfélögum sambandsins í sundur með ósmekklegum hætti. Full ástæða er fyrir verkafólk að hafa áhyggjur af væntanlegri niðurstöðu kjaraviðræðna Samtaka atvinnulífsins og þeirra stéttarfélaga sem nú hafa sameinast undir einum hatti þar sem sundruð verkalýðshreyfing nær aldrei árangri í kjarabaráttu.“

Stjórn og trúnaðarmannaráð Framsýnar samþykkti einnig í kvöld að leita eftir samstarfi við Verkalýðsfélag Akraness og Verkalýðsfélag Þórshafnar um samstarf í komandi kjaraviðræðum við Samtök atvinnulífsins um almenna kjarasamninginn.  Þá var samþykkt að fara þess á leit við ríkissáttasemjara að hann kalli samningsaðila saman til fundar á næstu dögum.  Framsýn.is