Vorfagnaður Hreims – „Það er svo gefandi að vera í karlakór“

Atli Vigfússon skrifar

0
416
Æfingar eru tvisvar í viku í félagsheimilinu Ýdölum

Karlakórinn Hreimur fagnar vori í félagsheimilinu Ýdölum nk. laugardagskvöld 21.apríl kl. 20.30. Sönggestir að þessu sinni eru félagar í Karlakór Kjalnesinga sem heimsækir Suður-Þingeyjarsýslu um þessar mundir. Þarna mætast bestur kórar norðan og sunnan heiða og má því búast við mikilli skemmtan. Kórarnir munu synga hvor í sínu lagi og sameinast svo í stórkostlegum söng sem enginn má missa af.

Karlakórinn Hreimur  hefur sett svip sinn á menningarlíf Þingeyinga í meira en fjóra áratugi.  Hann er skipaður um 60 mönnum  sem hittast tvisvar í viku í félagsheimilinu Ýdölum í Aðaldal,  allan veturinn, til þess að syngja og eiga stund saman. Kórinn hefur víða hafið upp raust sína og haldið tónleika í mörgum kirkjum og samkomuhúsum.  Kórfélagar hafa gefið út marga geisladiska og farið níu sinnum til útlanda. Formaður Hreims er Guðmundur Ágúst Jónsson bóndi í Fagraneskoti og lætur hann mjög vel af kórstarfinu.

Formaður Hreims, Guðmundur Ágúst Jónsson, heima í Fagraneskoti

„Ég var unglingur þegar  karlakórinn var stofnaður og þá sýndi ég félagsskap þessum ekki mikinn áhuga. Pabbi minn var einn af stofnendum kórsins á þeim árum og var fátt annað rætt á heimilinu þegar gesti bar að garði.  Árið 1981 gekk ég í kórinn, þá 22 ára, af  því að vinir mínir og frændur á sama aldri gerðu það sama. Síðan eru liðin 37 ár og þetta er búinn að vera gríðarlegur félagsskapur og marga vini er maður búinn að eignast í gegnum árin.“  Þetta segir Guðmundur  í Fagraneskoti, en hann hefur verið formaður karlakórsins Hreims um árabil. „Stundum var það þannig að maður var þreyttur og nennti ekki að fara á stað, en svo dreif maður sig og kom alltaf endurnærður af öllum æfingum.  Þetta eykur samheldni og samhug.  Mæting er alltaf góð og sjaldan sem einhverja vantar,“ segir Guðmundur og segir að enn séu í kórnum stofnfélagar og nefnir í því sambandi Guðmund Hallgrímsson frá Grímshúsum og Benedikt Arnbjörnsson á Bergsstöðum. Þá er Baldur Jónsson bóndi í Ystahvammi sá eini sem er búinn að vera samfellt í kórnum frá upphafi og er enn í dag að syngja. Hann er fæddur árið 1934 og er því 84 ára á þessu ári.  Hann sleppir ekki úr æfingum og hefur alltaf sömu ánægjuna af karlakórnum.  Hann er elstur kórfélaga, en sá yngsti er 21 árs.  Aldursmunurinn er því ríflega 60 ár, en samt er ekkert kynslóðabil. Allir eru félagar og mjög góðir vinir.  Guðmundur segist skilja vel þess gleði og lífsfyllingu sem karlakórinn er og líka það markmið  að skemmta áheyrendum með söng.

Söngstjórinn einbeitir sér og er nákvæmur.

Endalaus áhugi á tónlist

Frá haustdögum 2012 hefur Steinþór Þráinsson verið stjórnandi kórsins.  Steinþór ólst um við tónlist á æskuheimili sínu í Mývatnssveit og söng snemma sem barn og hóf síðan  tónlistarnám hjá móður sinni. Seinna var hann  m.a. tvo vetrarparta við nám í Tónlistarskóla Ísafjarðar og síðan lá leiðin í söngnám hjá Sigurði Demetz á Akureyri.  Þá stundaði hann söngnám og almennt tónlistarnám við Söngskólann í Reykjavík.  Á námsárum sínum söng hann með Kór Langholtskirkju og hann segist hafa endalausan áhuga á tónlist. Hann segir að starf hans sem kórstjóri sé mjög gefandi og alltaf sé það þannig að tónlistin opni leið inn að hjartanu.  Hann telur ekki eftir sér að keyra frá Akureyri á æfingar, þar sem hann býr í dag, en hver æfing tekur meira en 5 klukkutíma ef allt er talið. Þá er átt við akstur báðar leiðir, undirbúning við að stilla upp og svo sönginn sjálfan sem tekur um 2 klukkutíma með svolitlu kaffihléi, síðan frágang.  En það er þess virði og  sem betur fer hefur veðrið sjaldan hamlað för þennan veturinn.  Undirleikarinn, Steinunn Halldórsdóttir, er einnig alin upp tónlist og byrjaði að læra á píanó 7 ára gömul.  Hún lærði hjá Kristni Gestssyni og Önnu Málfríði Sigurðardóttur í Reykjavík og var við framhaldsnám í Óðinsvéum. Hún hefur og  lært í Finnlandi og sótt meistaranámskeið í Frakklandi og Póllandi.

Menn syngja af innlifun

Sungu  í Hörpunni

„Ég veit þú kemur,“  var  yfirskrift þeirrar dagskrár sem Karlakórinn Hreimur var með í Eldborgarsal Hörpu í síðasta mánuði.  Gestasöngvarar voru  þau Gissur Páll Gissurarson og Margrét Eir.  Hreimur söng með þeim í fyrra fyrir fullu húsi í Ýdölum á vorfagnaði og tókst það frábærlega.  Auk Gissurar og Margrétar sungu einsöngvarar  úr röðum kórfélaga og má þar nefna Ásgeir Böðvarsson og Sigurð Ágúst Þórarinsson.  Með kórnum á sviðinu var hljómsveit skipuð þeim Borgari Þórarinssyni, Gunnari Illuga Sigurðssyni og Pétri Ingólfssyni.  Efnisskráin var fjölbreytt með hefðbundnum karlakórslögum og lögum sem eru skemmtilega útsett fyrir karlakóra, allt yfir í dægurlagatónlist.

Karlakórsöngur er á uppleið

Guðmundur í Fagraneskoti segist trúa því að karlakórsöngur eigi sér mikla framtíð. Honum finnst áhugi á karlakórum hafa aukist frekar og nefnir í því samandi karlakórsmót sem haldið var nýlega. Hann segir að það hljóti að gefa mönnum mikið að koma saman. Margir keyri langan veg á æfingar og sá sem lengst á, fyrir utan kórstjórann,  þarf að aka 75 km. aðra leið og í þetta fari tími.

Feðgarnir í Fagraneskoti á æfingu með félögum sínum

„Ungir menn hafa gengið í kórinn nýlega,“ segir Guðmundur. „Ég hvatti son minn, Hrannar, til þess að ganga í kórinn og hann hefur mjög gaman af því og meira en ég bjóst við. Við feðgarnir höfum alltaf verið samhentir og það hefur mikið verið sungið þegar fólk í fjölskyldunni hefur komið saman. Hrannar ólst upp við tónlist í Hafralækjarskóla og öll ættarmót eru full af söng,“ segir Guðmundur og rifjar upp um leið það tímabil þegar  hann var í hljómsveit, sem ungur maður,  með föðurbróður sínum og frændum. Það var  Hljómsveit Illuga og þá  var mikið spilað og sungið á böllum.  Það var gríðarlega skemmtilegtur tími, en í dag á karlakórinn allan hug Guðmundar í Fagraneskoti sem hlakkar til þess í hvert sinn að hitta félaga sína í kórnum. –Það er svo gefandi.

Hljómsveitin á æfingu í mars sl
Í Hreim eru menn á öllum aldri og þar er ekkert kynslóðabil.
Og það er sungið

Texti og myndir: Atli Vigfússon