Umhverfis-og lýðheilsuþing Stórutjarnaskóla verður 9. apríl

Það tíunda í röð

0
54
Umhverfis og lýðheilsuþing. Úr myndasafni

Komið er að tíunda umhverfis- og lýðheilsuþingi Stórutjarnaskóla en það verður haldið þriðjudaginn 9. apríl nk. Starfsmenn og nemendur Stórutjarnaskóla standa að þinginu að venju en nemendur hafa margt til málanna að leggja. Þingið verður í sal skólans, það hefst kl 13:10 og stendur til kl. 15:20.

Aðal fyrirlesari þingsins að þessu sinni verður Snæbjörn Sigurðsson sem mun fjalla um orku framtíðarinnar en erindi hans mun bera yfirskriftina „Sjálfbær orkunýting á Norðausturlandi í nútíð og framtíð“ en einnig verður Orri Páll Jóhannsson aðstoðarmaður umhverfis- og auðlindaráðherra sérstakur gestur. Loftslagsmál hafa verið mjög í brennidepli undanfarið og um þau mun m.a. verða fjallað af hálfu nemenda. Anita Karen Guttesen rýnir í verkefni skólans í heilsueflandi málum, hvað höfum við gert? Þá verður farið í saumana á umfjöllunarefni þinganna fram til þessa og rifjað upp.

Á síðustu níu þingum hafa komið fram 17 fyrirlesarar víðsvegar af landinu með fræðslu um mál sem hafa snúist um umhverfis- og lýðheilsumál. Af nógu er að taka og allt eru þetta málefni sem snerta alla með einum eða öðrum hætti.

Auk þess að nemendur komi fram með sín málefni eru þeir þátttakendur í  tónlistardeild skólans og munu flytja nokkur tónlistaratriði og vera leiðandi í fjöldasöng því „söngurinn göfgar og glæðir“.

Þar sem þetta er 10. þingið bjóðum við að þessu sinni sérstaklega velkomna til okkur eldri nemendur og aðra þá sem komið hafa að málum á þessum 10 árum. Ekki síður bjóðum við til okkar foreldrum og íbúum nær og fjær og fulltúum sveitarfélagsins í ráðum og nefndum því umfjöllunarefnið er brýnt og unga fólksins bíður ærið verkefni.

Umhverfis- og lýðheilsunefnd Stórutjarnaskóla