Tryggvi Snær semur við Þór

0
109

Í dag undirritaði körfuknattleiksdeild Þórs þriggja ára samning við einn efnilegasta körfuboltamann landsins Tryggva Snæ Hlinason frá Svartárkoti í Bárðardal. Þrátt fyrir að hafa aðeins æft körfubolta í eitt ár hefur Tryggvi vakið verðskuldaða athygli og ekki síst fyrir hæð sína og hreyfanleika en hann mælist nú 216 cm að hæð í skóm. Frá þessu segir á vef Þórs

Tryggvi Snær Hlinason og Ágúst Herbert Guðmundsson. Mynd af vef Þórs
Tryggvi Snær Hlinason og Ágúst Herbert Guðmundsson. Mynd af vef Þórs

 

Að sögn Ágústar H. Guðmundssonar sem haft hefur veg og vanda að fyrstu skrefum Tryggva á körfuboltabrautinni, er mikilvægt að tekin verði rétt skref í þjálfun og uppbyggingu á svo efnilegum íþróttamanni sem Tryggvi er.  Nú þegar hefur samvinna Þórs og KKÍ verið sett í skipulagðan farveg varðandi þjálfun miðherjans unga og stefnir í að Tryggvi muni leika sína fyrstu unglingalandsleiki í sumar og því dvelja langtímum saman undir handleiðslu Einars Árna Jóhannssonar landsliðsþjálfara.

 

 

 

 

 

 

Með undirritun þessa samnings ætla Þórsarar að leggja enn meiri slagkraft í meistaraflokksstarfið og stefna ótrauðir á úrvalsdeildarsæti að ári liðnu.  Unglingastarf Þórs hefur undanfarin ár verið í miklum blóma þar sem yngri lið félagsins eru m.a. í fremstu röð og styttist því í að margir efnilegir leikmenn komist á meistaraflokksaldur.

Vefur Þórs á Akureyri