Tónkvíslin í beinni á Bravó – Leynigestur og símakosning á vinsælasta laginu

0
122

Tónkvíslin, söngkeppni Framhaldsskólans á Laugum, fer fram æi kvöld í íþróttahúsinu á Laugum. Þetta er í tíunda skipti sem hún fer fram. Það eru ekki aðeins nemendur framhaldsskólans sem koma fram heldur er nemendum grunnskóla á norðausturhluta landsins einnig boðið að taka þátt. Krakkar allt frá Þingeyjasveit til Vopnafjarðar koma og syngja fyrir framan rúmlega 600 manns. Í ár stendur til að senda beint út frá keppninni á sjónvarpsstöðinni Bravó. Frá þessu er sagt á vísi.is

Tónkvísl 2015

„Allt í allt eru þetta átján atriði, níu úr framhaldsskólanum og níu úr grunnskólunum,“ segir Tómas Guðjónsson, meðlimur framkvæmdastjórnar keppninnar. Hann bendir á að keppnin er alfarið skipulögð og undirbúin af nemendum skólans sem sé heilmikið fyrirtæki. Í fyrra var Herbert Guðmundsson leynigestur Tónkvíslarinnar og í ár verður einnig landsþekkur leynigestur á Tónkvíslinni.

„Á undanförnum árum hefur hún stækkað mikið. Fyrir tveimur árum fengum við betri myndavélar og vinnslu á upptökunum og í fyrra stækkuðu ljósin og kerfið allt saman.“

Kostnaður við keppnina hleypur á mörgum milljónum en fyrirtæki hafa verið dugleg við að koma til móts við nemendur. Skólinn sjálfur kemur ekkert að nema að gefa nemendum undanþágur frá mætingu og veita þeim einingar í samræmi við vinnuna.

Sérstök dómnefnd velur sigurlagið í keppni grunnskólanna og einnig sigurlag Tónkvíslarinnar, söngvakeppni Framhaldsskólans á Laugum. Það lag verður svo framlag Framhaldsskólans á Laugum í söngvakeppni Framhaldsskólanna. Áhorfendur velja svo vinsælasta lagið í báðum flokkum, í sérstakri símakosningu, en þar er nýjung á Tónkvíslinni. Vinsælasta lagið fær sérstaka viðurkenningu.

Sýnt verður frá keppninni í beinni útsendingu á sjónvarpsstöðinni Bravó. Tíu upptökuvélar verða á svæðinu og ljós og hljóð verður eins og best verður á kosið. Vísir.is

Hér er hægt að fylgjast með Tónkvíslinni í beinni útsendingu á Bravó