Þingeyskar ástarsögur óskast

0
19

Jenný Lára Arnórsdóttir, leikkona og leiksjtóri, er að búa til leiksýningu út frá ástarsögum Þingeyinga. Markmiðið er að draga fram í dagsljósið ástarsögur fyrri tíma og miðla þeim í leikverki sem flutt verður í desember í sveitarfélögunum í Þingeyjarsýslum.

Jenný Lára Arnórsdóttir
Jenný Lára Arnórsdóttir

Farið verður í ferðalag gegnum tímann og ástina, frá sögum langa-ömmu og –afa yfir í ungt fólk í dag sem er að hefja lífið saman. Hvað er það sem er að virka hjá þeim sem ná saman í ástinni?

Allt í kringum okkur eru fallegar sögur af því hvernig fólk nær saman, sem er ástæðan fyrir veru okkar hérna.

Markmiðið er að rifja þær upp, skemmta okkur og ylja okkur um hjartarætur sem og að minna okkur á kærleikann.

Núna er Jenný Lára að auglýsa eftir fólki frá svæðinu sem er til í að taka þátt með því að deila með henni sögum af því hvernig það kynntist ástinni sinni og ferðalag þeirra frá fyrstu sýn að þeim punkti sem sambandið er í dag. Einnig óskar hún eftir ábendingum um pör með fallegar, venjulegar, óvenjulegar, skemmtilegar, skrítnar en umfram allt raunverulegar ástarsögur. Eina skilyrðið er að viðkomandi sé búsettur í Þingeyjarsýslu og að sagan hafi góðan endi, það er að segja, að parið hafi endað saman. Enginn nöfn verða notuð í verkinu og fyllstu nafnleyndar gætt.

Stefnt er að því að ná 6-12 sögum í verkið. Bókaðir verða fundartímar með væntanlegum þátttakendum , þar sem Jenný Lára mun ferðast um svæðið og hitta viðmælendur, taka upp frásögnina og spyrja út í söguna. Frásagnirnar verða teknar upp og stuðst verður við verbatim-aðferð til handritsgerðar og karaktersköpunnar. Það eru því íbúar sýslunnar sem skapa verkið að vissu leyti.

Ef þú lumar á sögu, eða veistu um að einhver lumi á góðri sögu, máttu endilega hafa samband á hrafnstjarna@gmail.com fyrir 6. október Þangað má einnig senda fyrirspurnir um verkefnið.