Þingeyingum fjölgar um 7,7%

5320 manns búa í Þingeyjarsýslum

0
217

Hagstofan birti í dag tölur um mannfjölda 1. janúar sl. og skv. þeim hefur landsmönnum fjölgað um rúm 10 þúsund frá fyrra ári eða rétt um 3%. Fjölgunin á höfuðborgarsvæðinu var um 2,6% en í einstökum landshlutum fjölgaði mest á Suðurnesjum eða 7,4%. Minnst fjölgun varð á Norðurlandi vestra eða 0,5%. Á Norðurlandi eystra fjölgaði um 2,6% en á starfssvæði atvinnuþróunarfélagsins fjölgaði um 379 manns eða 7,7%. Frá þessu segir á vef Atvinnuþróunarfélags Þingeyinga.

Í megin atriðum er þróunin lík og fyrir ári síðan þar sem stórfjárfestingar á Húsavíkursvæðinu og öflugur vöxtur í ferðaþjónustu í suðursýslunni endurspeglast í mikilli íbúafjölgun á meðan austursvæðið sem býr að uppistöðu til við sjávarútveg og landbúnað á frekar undir högg að sækja hvað varðar íbúaþróun. Þó er ánægjulegt að sjá að bæði á Raufarhöfn og Kópaskeri hefur sá jákvæði viðsnúningur átt sér stað að í báðum þorpunum fjölgar nú íbúum.

Í töflunni hér að neðan eru þessar tölur greindar frekar eftir sveitarfélögum og skilgreindum þéttbýlisstöðum á svæðinu. Frétt Hagstofunnar má svo lesa hér.