Aðalsteinn Árni Baldursson formaður Framsýnar-stéttarfélags fer hörðum orðum um afstöðu Más Guðmundssonar seðlabankastjóra til kjaramála almenns launafólks í viðtali við Skarp, sem kom út í fyrradag. Seðlabankastjóri hefur tjáð sig um komandi kjaraviðræður, hann segir nauðsynlegt að semja um „hóflegar“ kjarabætur á almennum vinnumarkaði. Í sama streng hafa Samtök atvinnulífsins tekið. Frá þessu er sagt á Framsýnarvefnum
„Þetta er bara gömul tugga. Seðlabankastjórinn virðist vera eins og björninn, hann heldur sér vakandi þegar verkalýðshreyfingin er að móta sína kröfugerð fyrir láglaunafólkið í landinu. Þess á milli skríður bankastjórinn í híði sitt og sefur vært, svo sem þegar kennarar, flugmenn, og læknar hafa verið að semja um sín kjör. Staðreyndin er sú að millistjórnendur og stjórnendur hafa hækkað gríðarlega í launum og stjórna í raun og veru launaskriðinu,“ segir Aðalsteinn ma. í viðtali við Skarp.
Í vikunni stóð Framsýn fyrir félagsfundi um kjaramál í gær. Í upphafi fundar voru fundarmenn beðnir um að taka þátt í leynilegri launakönnun. Sé tekið meðaltal svarenda kemur í ljós að menn telja að grunnlaun þurfi að vera kr. 311.244,- á mánuði og að samið verði til allt að þriggja ára.
Reiknar með átökum á vinnumarkaði.
