Stórmót ÍR

Fimm gull, þrjú silfur og fimm brons

0
299
Frá Friðarhlaupinu

Helgina 11.-12.febrúar fóru 26 keppendur frá HSÞ, ásamt þremur farastjórum og tveimur þjálfurum, á stórmót ÍR. Farið var með rútu frá Fjallasýn og farþegum safnað saman á Húsavík, við Einarsstaðaafleggjara og svo á Fosshóli. Með okkur í för voru keppendur UFA og tókum við þau upp í við Bogann. Ferðin suður gekk mjög vel og vorum við komin í Laugalækjarskóla, þar sem við gistum, rúmlega níu um kvöldið.

Þegar búið var að koma sér fyrir fengum við okkur hressingu og svo fóru menn að undirbúa sig í svefn. Fyrstu keppendur hófu keppni um níu á laugardagsmorguninn og þeir síðustu voru að ljúka keppni um hálf sjö um kvöldið svo það var löng og ströng viðvera en keppendur okkar stóðu sig mjög vel þennan daginn, hvort sem þeir voru að keppa eða hvetja upp í stúku. Þegar búið var að næra sig á lasagne fórum við í sund að slaka á og leika okkur. Áður en farið var að sofa fengu menn sér smá næringu. Það voru ekki eins margir sem voru að keppa á sunnudeginum og þá voru hinir sem ekki voru að keppa fengnir til að aðstoða við að pakka saman og ganga frá í skólanum áður en farið var í höllina.

Skemmtilegt að segja frá því að á sunnudeginum var dagskráin brotin upp með friðarhlaupi en þetta er annað árið í röð sem Stórmót ÍR er heimsótt. Eftir stutta friðarstund var hlaupinn einn hringur á brautinni og tók HSÞ að sjálfsögðu mjög virkan þátt í þessari athöfn. Friðarhlaupið er 30 ára á þessu ári. Upp úr klukkan fimm lauk mótinu og þá drifu menn sig upp í rútu og haldið heim á leið með smá hamborgarastoppi í Borgarnesi.

Keppendur frá HSÞ

Alls fengu keppendur HSÞ fimm gull, þrjú silfur og fimm brons og voru með 36 persónulegar bætingar sem er stórglæsilegur árangur. Björg Gunnlaugsdóttir 11 ára var í 2.sæti í 60m, 1.sæti í 600m og 1.-2.sæti í hástökki. Hafþór Höskuldsson 12 ára var í 2.sæti í kúluvarpi. Heimir Ari Heimisson 15 ára var í 1.sæti í hástökki og 2.sæti í 60m grind. Jón Alexander Artúrsson 15 ára var í 1.sæti í kúluvarpi. Áslaug Munda Gunnlaugsdóttir 16 ára var í 1.sæti í langstökki og 3.sæti í 60m grind. Halldór Tumi Ólason 16 ára var í 3.sæti í langstökki. Hilmir Smári Kristinsson var í 3.sæti í 800m. Eyþór Kári Ingólfsson 17 ára var í 3.sæti í stangarstökki og hástökki.

Við þökkum Fjallasýn, Mjólkursamlaginu, Hveravöllum og Ölgerðinni fyrir veittan stuðning og við viljum líka þakka fyrir bakkelsið sem við fengum frá nokkrum foreldrum. Takk fyrir samveruna um helgina keppendur og til hamingju með árangurinn.

Fleiri myndir má skoða hér