Óveður og rafmagnsleysi.

0
4

Óveður gengur nú yfir allt Norðurland. Alhvít jörð var víða í Þingeyjarsýslu í morgun og nánast ófært smærri bílum, Við erum að kalla út meiri mannskap til að reyna að lágmarka tjónið,“ sagði Pétur Vopni Sigurðsson, hjá RARIK á Akureyri í samtali við Morgunblaðið í morgun en rafmagnsstaurar hafa brotnað í Mývatnssveit vegna mikillar ísingar. Rafmagnslaust er að sögn í N-Þingeyjarsýslu, Mývatnssveit, Aðaldal, hluta Reykjadals og Bárðardal.

RARIK er með varaaflsvélar á norðausturlandi, en þær framleiða ekki nægilegt rafmagn til að hægt sé að halda upp rafmagni á öllu svæðinu. Pétur biður fólk á norðausturlandi að spara rafmagn. Hann segir að skammta þurfi rafmagn og búast megi við rafmagnstruflunum fram eftir degi því um víðtæka bilun sé að ræða.

„Það er ísingarveður og nokkrir staurar hafa brotnað í Mývatnssveit,“ segir Pétur en hann sagði í morgun að ísing væri enn að hlaðast á rafmagnslínurnar.

Ekki bætti ástandið að Laxárlína sem liggur frá Laxárvirkjun að Kópaskeri bilaði í nótt, en línan er í eigu Landsnets. Ekki er búið að finna bilunina, en talið er líklegt að hún hafi bilað vegna ísingar.