Opinn dagur í íþróttahúsinu á Laugum á sumardaginn fyrsta

0
30

Framhaldsskólinn á Laugum býður alla velkomna á opinn dag í íþróttahúsi skólans á sumardaginn fyrsta, 23. apríl, frá kl. 13:00 – 16:00. Kynning verður á námsframboði skólans, en hann býður upp á nám á almennri námsbraut, félagsfræðibraut, íþróttabraut og náttúrufræðibraut. Einnig verða verkefni nemenda í einstökum áföngum til sýnis og til kynningar. Nemendafélag skólans, NFL, verður með kynningu á félagslífi nemenda auk þess að bjóða upp á kynnisferðir um húsakynni og heimavistir skólans.

Laugar logo

Veitingar verða í boði skólans frá kl. 14:00 – 16:00 í matsalnum í Gamla skóla. Skólahljómsveitin Galilei mun halda tvenna styrktartónleika á skrifstofu skólameistara í Gamla skóla. Þá fyrri kl. 13:30 og þá seinni kl. 15:00. Aðgangseyrir er 1000 kr. og rennur hann óskiptur til Styrktarsjóðs Umhyggju – félags til stuðnings langveikum börnum.

 

Aðrir aðilar sem munu taka þátt í opna deginum og kynna sína starfssemi eru, Brunavarnir Skútustaðahrepps og Þingeyjarsveitar, Björgunarsveitir í Þingeyjarsveit, Kvenfélagasamband Suður-Þingeyinga, UMF Efling, Urðarbrunnur, Rauði krossinn Þingeyjarsýslu og Skákfélagið Huginn.

Héraðsmót HSÞ í skák

Skákfélagið Huginn efnir til Héraðsmóts HSÞ í skák í fullorðinsflokki sama dag og fer mótið fram í Sigurðarstofu í Gamla skóla og hefst það kl 15:00. Áhugasamir geta skráð sig til leiks á staðnum. Forskráning í mótið er á netfangið lyngbrekku@simnet.is. FRÍTT er í mótið.

Þingeyjarsveit býður öllum gestum og gangandi FRÍTT í sundlaugina á Laugum milli kl. 14:00 og 18:00 í tilefni dagsins.