Norðurþing lýsir yfir áhuga á því að taka á móti flóttafólki

0
58

Eftirfarandi bókun var samþykkt samhljóða í bæjarráði Norðurþings í gær.

Norðurþing

Bæjarstjóri Norðurþings Kristján Þór Magnússon mun þegar vera búinn að koma henni á framfæri með formlegum hætti við Velferðarráðuneytið.

 

 

„Bæjarráð Norðurþings fagnar því að íslensk stjórnvöld og stök sveitarfélög hafi lýst vilja til að taka á móti flóttamönnum. Mikilvægt er að þær þjóðir og þau samfélög sem geta, axli ábyrgð og geri sitt til að létta á vanda þar sem brýn þörf krefur. Norðurþing hefur góðar aðstæður til að leggja lóð á vogarskálarnar og greiða fyrir því að flóttamönnum verði sköpuð ný tækifæri og góð lífsskilyrði. Í Norðurþingi er öflugt og fjölbreytt samfélag, töluvert framboð atvinnu og góður grunnur til að taka á móti nýjum íbúum og þar á meðal flóttafólki. Þá er töluverð reynsla í samfélögum Norðurþings í móttöku nýbúa. Því má ljóst vera að sveitarfélagið er vel í stakk búið til að veita flóttafólki skjól og leggja þannig sitt af mörkum til mannúðarmála í heiminum. Móttaka flóttamanna verði þegar tekin til umfjöllunar í félags- og barnaverndarnefnd, fræðslu- og menningarnefnd og tómstunda- og æskulýðs Norðurþings til umfjöllunar og útfærslu, s.s. varðandi fjárhagslega þætti og samstarf við mannúðar- og félagasamtök. Bæjarstjóra jafnframt falið að hafa samband við velferðarráðuneytið og óska eftir viðræðum um að sveitarfélagið geti við fyrsta tækifæri tekið á móti flóttafólki.“

Óli Halldórsson
Óli Halldórsson

 

„Ég held að móttaka á flóttafólki geti dregið fram styrkleika sem leynast í minn samfélögum, með styttri boðleiðum og persónulegri stjórnsýslu. Mikil umræða og jákvæðni Þingeyinga gangavart þessu verkefni ýtir við okkur“, sagði Óli Halldórsson formaður bæjarráðs Norðurþings í spjalli við 641.is í dag.