„Minn eða þinn sjóhattur?“

0
85

Bógómíl Font til liðs við Karlakór Akureyrar-Geysi. Saman á tónleikum í Hofi.

Karlakór Akureyrar-Geysir, Bógómíl Font og hljómsveit, sameinast á tónleikum í Hamraborg í Menningarhúsinu Hofi, föstudaginn 5. júní, kl. 20:00. Sérstakur gestur er Óskar Pétursson. Tónleikarnir eru tileinkaðir sjómönnum og sjómennsku og því haldnir helgina sem ber upp á sjómannadaginn.

Karlakór Akureyrar

Þessir tónleikar eru ólíkir öllu því sem KAG hefur hingað til gert og kórfélagar feta þarna alveg nýjar og spennandi slóðir. Söngskráin er afar óvenjuleg fyrir karlakór; létt, þung, glettin, ljúf, rokkuð, en umfram allt ákaflega skemmtileg.
 

KAG flytur karlakórslög í nýjum búningi og popp og rokk í karlakórsbúningi. Syngur á íslensku, ensku, sænsku. Lög með Bógómíl Font, Bubba Morthens, Rod Stewart, Hauki Mortens, Ólafi Þórarinssyni. Svo koma við sögu Davíð Stefánsson, Páll Ísólfsson, Áskell Jónsson, Sigfús Halldórsson og fleiri. Saman er þetta stórskemmtileg blanda, sjómannaprógramm og KAG með sjóhatt!

Hjörleifur Örn Jónsson er stjórnandi KAG. Hann hefur útsett flest laganna fyrir kórinn á þessum tónleikum. Bógómíl Font mætir í Hof í sínu besta formi og hljómsveitin hans er skipuð fanta góðum tónlistarmönnum. Svo er ánægjulegt að hafa tenórinn okkar, Óskar Pétursson, með í þessum hópi.

Miðaverð er 4000 krónur og miðasala á www.menningarhus.is.