Meðalvigt dilka á Húsavík aldrei verið hærri

0
19

Um 79.000 fjár var slátrað á Húsavík í haust og 35.100 á Höfn. Fleira fé hefur ekki verið slátrað á Húsavík síðan 2007 og meðalvigt dilka hefur aldrei verið hærri þar á bæ. Sigmundur Hreiðarsson, vinnslustjóri Norðlenska á Húsavík, er ánægður með sláturtíðina. „Hvað varðar kjötgæði, þá mældist kjötgerð 8,40 en var í fyrra 8,23, fita mældist 6,49 á móti 6,42 í fyrra og þar af leiðir að meðalvigt var 16,52 kg á móti 16,28 kg árið 2012 og reyndar er meðalvigt 2013 sú hæsta  sem hér hefur mælst,” segir Sigmundur.  Norðlenska.is segir frá.

Sláturhús Norðlenska á Húsavík. Mynd af vef norðlenska.is
Sláturhús Norðlenska á Húsavík. Mynd af vef norðlenska.is

„Að lokinni  svona vertíð er ástæða til að þakka starfsfólki, verktökum sem að þessu koma og ekki síst bændum fyrir góð samkipti, því að sjálfsögðu reynir á dugnað og lipurð hjá öllum til að vel gangi,” segir Sigmundur Hreiðarsson.

Einar Karlsson, sláturhússtjóri Norðlenska á Höfn, er einnig ánægður. Þar mældist kjötgerð 8,20 en var í fyrra 8,45, fita mældist 6,47 á móti 6,86 í fyrra og meðalþyngd var heldur lægri en í fyrra, 15,77 kg nú á móti 16,19 kg árið 2012. Alls var slátrað 35.051 fjár nú á Höfn en 35.323 á síðasta ári.

„Það er ekki hægt að segja annað en sláturtíðin hafi gengið mjög vel. Við sluppum við óveður nema í fyrstu vikunni, þegar gerði mikið hvassviðri þannig að fyrir vikið fórum við aðeins hægar af stað en við ætluðum. En að öðru leyti gekk allt upp,” segir Einar Karlsson.