Lokaverkefni Írisar Arngrímsdóttur frá Granastöðum í vélstjórn fært VMA að gjöf

0
535
Iríis Arngrímsdóttir með túrbínuna. Mynd: Óskar Þór Halldórsson
Íris Arngrímsdóttir frá Granastöðum í Út-Kinn brautskráist úr vélstjórn í VMA síðar í þessum mánuði. Í lokaverkefni sínu í náminu gerði hún upp og prófaði um þrjátíu ára gamla Francis vatnsaflstúrbínu sem föðurbróðir hennar, Eiður Jónsson í Árteigi í Út-Kinn, smíðaði. Íris starfar hjá Landsvirkjun – í Laxárvirkjun. Frá þessu segir á vef VMA.
Íris kynnti verkefni sitt og túrbínuna á dögunum þegar kynnt voru lokaverkefni allra nemenda sem eru að útskrifast úr vélstjórn í lok maí. Vélaverkstæðið í Árteigi hefur nú fært VMA túrbínuna að gjöf og segir Vilhjálmur G. Kristjánsson, kennari í vélstjórn, að hún muni nýtast afar vel í kennslu í vatnsvélarfræði.
Francis túrbínan sem VMA hefur verið færð að gjöf. Mynd: Óskar Þór Halldórsson
Eiður Jónsson í Árteigi segir að Francis-túrbínuna, sem er með rétt um 800 watta afl, hafi hann smíðað á sínum tíma fyrir sumarbústað sem Jón Gunnarsson á Dalvík byggði. Síðar var sett aflmeiri túrbína í bústaðinn og þá tók Eiður Francis-túrbínuna aftur og hefur hún staðið óhreyfð í langan tíma, þar til nú.
Francis vatnsaflstúrbína – uppgerð og prófun
Íris Arngrímsdóttir
Íris sagði að hugmyndin að verkefninu hafi í raun komið frá Ingimar Árnasyni, kennara í VMA. Hún sagði að verkefnið hafi litast af því faðir hennar væri túrbínusmiður. Verkefnið fólst í því að gera upp og prófa Francis vatnsaflstúrbínu sem föðurbróðir Írisar smíðaði fyrir um þrjátíu árum. Jafnframt sagði Íris að markmið sitt með verkefninu hafi verið að auka þekkingu sína á vatnsaflsvélum, enda starfi hún hjá Landsvirkjun, og síðast en ekki síst að auka hæfni sína í að tölvuteikna. Túrbínuna teiknaði Íris í Fusion 360 og segir hún að það hafi komið mjög vel út.
Vélaverkstæðið í Árteigi hefur smíðað túrbínur fyrir bæði innanlands- og utanlandsmarkað. Átta túrbínur hafa farið til Grænlands og ein til Bandaríkjanna, Færeyja og Rússlands. Eiður segir að næg verkefni séu og mögulega megi ætla að hér innanlands verði aukin spurn eftir slíkum túrbínum, ef marka má umræðu um aukinn áhuga á að byggja smávirkjanir á Íslandi. Aflmesta túrbínan sem Vélaverkstæðið í Árteigi hefur smíðað er 700 kW.
VMA vill koma á framfæri innilegu þakklæti til annars vegar Írisar og hins vegar Arngríms föður hennar og Eiðs föðurbróður hennar, sem eiga og reka Vélaverkstæðið í Árteigi, fyrir þessa höfðinglegu gjöf.