Listamenn og lítil samfélög

0
5

Í fyrradag var haldið málþing á Raufarhöfn um innkomu listamanna í fámenn samfélög og mættu tæplega fimmtíu manns á þetta fróðlega og skemmtilega málþing.

Kartín Jakbosdóttir

 

 

 

 

 

 

 

 

 

Meðal þess sem rætt var um eru þau tækifæri sem felast í því að listamenn kaupi yfirgefin hús í litlum bæjarfélögum og hvernig hægt sé að nýta nærveru listamannanna bæjarfélögum til framdráttar.

Hopur

Bergur Elías Ágústsson bæjarstjóri í Norðurþingi setti málþingið og bauð gesti velkomna en fundarstjórn var í höndum Friðriks Sigurðssonar bóksala og bæjarstjórnarfulltrúa í Norðurþingi.

Frummælendur á málþinginu voru Katrín Jakobsdóttir ráðherra menningar- og menntamála og í máli hennar kom m.a. fram að skapandi greinar velta milljörðum á ári hverju á Íslandi og einnig kom fram hjá henni að áhugi og vilji að styðja við bakið á frumkvöðlastarfi heima í héraði.

KB

Kolbrún Halldórsdóttir forseti Bandalags íslenskra listamanna steig næst í pontu og var ánægð með að hafa verið boðið á þetta málþing og sagði Bandalagið tilbúið til frekara samstarfs við heimamenn.

Ásdís Thoroddsen kvikmyndagerðarmaður og einn af eigendum gamla Kaupfélagins á Raufarhöfn, flutti því næst áhugaverða tölu um tækifærin sem fælust í svæðinu og kom með margar tillögur að lausnum.

Snorri Freyr Hilmarsson  leiksviðshönnuður og einn af eigendum Óskarsstöðvarinnar á Raufarhöfn lýsti aðkomu hans að húsinu og sýndi myndir frá uppbyggingu þess ásamt því að sýna myndasýningu víðs vegar að úr heiminum þar sem hnignun hefur átt sér stað.

Að afloknu kaffihléi flutti Þórunn Eymundardóttir myndlistamaður og íbúi á Seyðisfirði fróðlegan lestur um þá þróun sem átt hefur sér stað þar á bæ.  Fjöldi listamanna hefur flutt eða hefur afdrep til lengri eða skemmri dvalar á Seyðisfirði og hefur það breytt bæjarbragnum verulega til góðs að hennar mati.

Ragnheiður Jóna Ingimundardóttir menningarfulltrúi Eyþings kynnti að lokum verkefni sem Menningarráð Eyþings og fleiri standa fyrir þar sem í boði verða styrkir til burtfluttra ungra listamanna til að koma og skapa eða sýna verk sín á svæðinu.

Jakob S. Jónsson leikstjóri óskaði eftir því að ávarpa málþingið og þakkaði öllum fyrir frábær erindi og brýndi menn til dáða.

Erlingur Thoroddsen hótelstjóri og frumkvöðull flutti svo lokaorð og sleit málþinginu.

Heimsskautagerdid

Að þinginu afloknu héldu gestir að Heimskautsgerðinu sem nú er í byggingu og gerði ráðherra góðan róm af því starfi sem þar hefði verið unnið.

Gunnar Jóhannesson tók meðfylgjandi myndir.