Landsvirkjun og PCC Bakki Silicon undirrita raforkusölusamning

0
13

Landsvirkjun tilkynnti í dag að fyrirtækið hefur undirritað raforkusölusamning við PCC Bakki Silicon hf. Samkvæmt samningnum mun Landsvirkjun útvega rafmagn fyrir kísilmálmverksmiðju sem PCC Bakki Silicon áformar að reisa við Bakka við Húsavík. Gert er ráð fyrir að verksmiðjan hefji starfsemi snemma á árinu 2017 og muni framleiða allt að 36 þúsund tonn af kísilmálmi og nota 58MW af afli sem unnið verður með endurnýjanlegum hætti í jarðvarma- og vatnsaflsvirkjunum.

Bakki-Bakkahöfði.
Bakki-Bakkahöfði.

„Við erum mjög ánægð að ná auknum fjölbreytileika í viðskiptavinahóp okkar og bjóðum PCC Bakki Silicon og kísilmálmiðnaðinn velkominn í viðskipti til okkar. Við erum viss um að kísilmálmiðnaður muni dafna á Íslandi til langs tíma þar sem raforka er unnin úr endurnýjanlegum orkugjöfum. Aðstæður á Íslandi henta vel til að orkufrekur iðnaður geti hér náð samkeppnisforskoti í Evrópu og á alþjóðlega vísu,“ sagði Hörður Arnarson forstjóri Landsvirkjunar. „Við erum einnig mjög ánægð að langt samstarf okkar við PCC Bakki Silicon hafi nú náð þessum mikilvæga áfanga og við lítum björtum augum til næstu verkefna og áframhaldandi samstarfs.“

„Síðustu ár hefur PCC Bakki Silicon unnið ötullega að því að þróa kísilmálmverkefni okkar á Bakka þar sem við teljum fyrsta flokks aðstæður vera fyrir hendi til að byggja og reka kísilmálmverksmiðju. Við höfum notið stuðnings og átt gott samstarf við íslenska samstarfsaðila okkar, sveitarfélagið og stjórnvöld. Samstarf okkar við Landsvirkjun hefur verið faglegt og traust og undirritun raforkusölusamningsins í dag er mjög mikilvægur áfangi í verkefni okkar,“ segir Peter Wenzel, sem er stjórnarmaður í PCC Bakki Silicon og leiðir verkefnið fyrir hönd fyrirtækisins.

Samningurinn er undirritaður með ákveðnum fyrirvörum sem þurfa að vera uppfylltir síðar á árinu, þ.m.t. um tilheyrandi leyfisveitingar og fjármögnun, auk samþykki stjórna beggja félaganna. (landsvirkjun.is)