1. febrúar er Dagur kvenfélagskonunnar. Dagurinn, sem er stofndagur Kvenfélagasambands Íslands, (1930) var formlega gerður að degi kvenfélagskonunnar árið 2010, til að vekja athygli á miklu og óeigingjörnu starfi kvenfélagskvenna. Það var enda löngu tímabært að kvenfélagskonur fengju sinn eigin dag á dagatalinu. Kvenfélög og kvenfélagskonur eru hvattar til að muna eftir deginum og jafnvel gera sér dagamun hver og ein eða saman, en einnig að vera tilbúnar til að taka á móti hamingjuóskum og athygli þennan dag.
Fyrir tveimur árum bauð kvenfélag Mývatnssveitar öllum 11 kvenfélögunum í Kvenfélagasambandi Suður Þingeyinga heim og var það kvöld flestum alveg ógleymanlegt og auðvitað vilja konur halda áfram að hittast í tilefni dagsins. Þar sem 1. febrúar bar upp á laugardag í ár og margar konur á leið á þorrablót, var ákveðið að taka smá forskot á daginn og komu konur í Kv.S.Þ. saman í Ljósvetningabúð s.l. fimmtudagskvöld. Kvenfélag Fnjóskdæla, kvenfélagið Hildur í Bárðardal og kvenfélag Ljósvetninga voru gestgjafar og buðu öllum kvenfélögum sambandsins til samverunnar. Um 150 kvenfélagskonur þáðu boðið og skemmtu sér konunglega. Gestafélög lögðu til skemmtiatriði en gestgjafar buðu uppá súpu með brauði og síðan kaffi og konfekt. Er skemmst frá því að segja að konur áttu saman notalega kvöldstund, skemmtiatriðin voru fjölbreytt og mikið hlegið.
