Íslenski skákdagurinn er á laugardag – Söfnun fyrir Velferðarsjóð Þingeyinga

0
51

Í tilefni af Íslenska skákdeginum 26. janúar nk. mun Skákfélagið Goðinn-Mátar og Velferðarsjóður Þingeyinga taka höndum saman og safna peningum fyrir sjóðinn. Íslenski skákdagurinn er nú haldinn í annað sinn en 26. janúar er fæðingardagur Friðriks Ólfassonar, fyrsta stórmeistara Íslendinga.

Félagsmerki Goðinn-Mátar

Söfnunin fer þannig fram að félagsmenn Goðans-Máta verða í anddyri Kaupfélagshússins á Húsavík, framan við matvörubúðina Kaskó, með skákborð og skákklukku.
Þar geta gestir og gangandi teflt við félagsmenn hraðskákir og greitt fyrir það að lágmarki 500 kr fyrir skákina. Eins geta þeir sem vilja greitt meira.
Allt fé sem safnast með þessum hætti mun renna til velferðarsjóðsins.

 

Ef svo fer að einhver gestur vinni einhvern félagsmann verður viðkomandi boðin aðild að skákfélaginu og fær fyrsta árgjaldið fellt niður.
Nú þegar hafa Heimilistæki heitið á Kristin Vilhjálmsson, hjá Víkurraf á Húsavík, 50.000 krónum ef hann teflir eina hraðskák við einhvern af félagsmönnum Goðans-Máta á Íslenska skákdeginum.
Hér með er skorað á fyrirtæki og einstaklinga í Þingeyjarsýslu að tefla eina köflótta við félagsmenn Goðans-Máta og leggja góðu málefni lið um leið.

Við þetta glæsilega skákborð, sem er í eigu Viðar Njáls Hákonarsonar, verður teflt á laugardaginn
Við þetta glæsilega skákborð, sem er í eigu Viðar Njáls Hákonarsonar, verður teflt á laugardaginn