Húsvíkingar fá hraðhleðslustöð

0
242
Hleðslustöðin tekin í notkun

Orka náttúrunnar hefur tekið í notkun nýja hlöðu með hraðhleðslu fyrir rafbíla á lóð Orkunnar á Húsavík. Það var Árni Sigurbjarnarson, einn af stofnendum hvalaskoðunarfyrirtækisins Norðursiglingar, sem fyrstur hlóð rafbíl í nýju hlöðunni, forláta Teslu. Stöðin mun auðvelda Árna að hlaða í heimabyggð en næstu hlöður ON eru á Akureyri og Mývatni.

Viðstaddir fyrstu hleðsluna voru auk Árna, Guðjón Hugberg Björnsson, tæknistjóri hjá ON,  Arngrímur Arnarson, markaðsstjóri Norðursiglingar og Axel Rúnar Eyþórsson, sérfræðingur í rafmagnsmálum hjá ON

Árni, sem nýlega seldi hlut sinn í Norðursiglingu, segir markmið fyrirtækisins ætíð hafa verið að efla sjálfbæra ferðaþjónustu og að stefna þess sé að vera leiðandi í umhverfisvænni ferðaþjónustu við strendur landsins. Fyrirtækið á og rekur tvo hvalaskoðunarbáta sem ganga fyrir rafmagni.  Með slíkum bátum má lágmarka útblástur koltvísýrings og minnka vélarhljóð, sem veldur minna ónæði fyrir hvalina.

Hleðslunetið þéttist á Norðurlandi

Hraðhleðslan á Húsavík er sú 36. hleðslan sem Orka náttúrunnar setur upp til að þjóna rafbílaeigendum. Hringvegurinn er þegar opinn rafbílaeigendum þar sem ON hefur varðað hann hlöðum. Á næstu vikum og mánuðum mun net þessara innviða orkuskipta í samgöngum á Norðurlandi þéttast með væntanlegum hraðhleðslum á Kópaskeri og Vopnafirði og hleðslum á Dalvík, á Laugum, í Ásbyrgi og á Raufarhöfn.

Í smáforritinu ON Hleðsla er hægt að sjá allar hlöður ON, hvernig tengjum þær eru búnar og hvort þær eru á lausu. Jafnframt býður appið upp á að sjá hlöður annarra fyrirtækja sem opnar eru almenningi og notendur þess geta fengið aðstoð frá kortavef Google til að finna skemmstu leiðina að hlöðunum.