Húsavíkurstofa skorar á ráðherranefndina að ýta Grímsstaðarverkefninu úr vör

0
59

Stjórn Húsavíkurstofu hefur ritað ályktun varðandi kaup sveitarfélaga á Norðausturlandi á jörðinni Grímsstöðum á Fjöllum.

Í henni segir m.a. að þessi fjárfesting, ef af henni yrði,  sé gríðarlega mikilvæg fyrir svæðið okkar. Þetta sé einstakt tækifæri til að byggja upp samfélagið og innviði þess hér á Norðausturlandi.

Yfirlýsing Húsavíkurstofu er svohljóðandi:

Grímsstaðir á Fjöllum

Undanfarna mánuði hefur verið unnið að mjög mikilvægu verkefni sem snertir alla íbúa Norðausturlands. 7 sveitarfélög hafa tekið sig saman um að kaupa u.þ.b. 22. þúsund hektara landsvæði Grímsstaða á Fjöllum af einkaaðilum. Breyta á nær öllu svæðinu í fólkvang, sem felur í sér umgengisrétt almennings og aukna náttúruvernd. Þar að auki stendur til að leigja lítinn hluta svæðisins (u.þ.b. 1%) til íslensks félags í eigu erlends aðila sem hyggst reisa hótel á svæðinu og stunda þar ferðaþjónustu.

Verði þetta verkefni að veruleika mun það hafa gríðarlega jákvæð áhrif í för með sér á Norðausturlandi og Íslandi öllu. Ef að líkum lætur munu tugir milljarða koma inn í íslenskt hagkerfi og örva hagvöxt. Hundruð starfa munu skapast á framkvæmdartíma, og þar á eftir. Ferðamönnum mun fjölga á svæðinu, sem aftur veldur aukningu afleiddra starfa. Verkefnið styrkir landsbyggðina, og skilyrði til búsetu þar, og er til þess fallið að hamla gegn landsbyggðarflótta. Þá verða vatnsréttindi í Jökulsá á Fjöllum sem og aðrar auðlindir í samfélagslegri eigu. Að lokum myndi þetta verkefni, verði það að veruleika, senda skýr skilaboð um að erlendir fjárfestar séu velkomnar hér á landi.

Skorað er á þá ráðherranefnd sem nú fjallar um málið að sjá til þess að þessu mikilvæga verkefni verði ýtt úr vör.

Stjórn Húsavíkurstofu