Hrútar – Íslensk kvikmynd tekin upp í Bárðardal í haust

0
209

Íslenska kvikmyndin Hrútar (The Rams) í leikstjórn Gríms Hákonarsonar, verður tekin upp í Bárðardal í haust. Grímur Hákonarson, sem fékk nýlega Edduverðlaunin fyrir heimildamyndina Hvell, skrifaði handritið og er framleiðandi myndarinnar ásamt Grímari Jónssyni . Tökur á myndinni munu fara fram á Mýri og Bólstað en þeir bæir standa hlið við hlið, alveg syðst í Bárðardal að vestan.

Mýri og Bólstaður í Bárðardal
Mýri og Bólstaður í Bárðardal

 

 

 

 

 

 

 

 

 

 

 

 

 

 

 

 

 

Í aðalhlutverkum verða þeir Sigurður Sigurjónsson og Theodór Júlíusson og munu tökur fara fram í ágúst og í nóvember nk. Nánast allar tökur fara fram í Bárðardal og þá að mestu leiti á Mýri og Bólstað. Einhverjar tökur fara fram á Lundarbrekku og í Kiðagili og síðan er ein áætluð á Húsavík.

Grímur Hákonarson
Grímur Hákonarson

 

 

Að sögn Gríms Hákonarsonar leikstjóra og handritshöfundar er kvikmyndin Hrútar klassískt drama með lúmskum húmor en hefur enga tengingu við Mýri eða Bólstað. „Það var myndræn ákvörðun að taka myndina þarna upp. Bæirnir standa mjög nálægt hvor örðum, frekar langt er til næstu bæja og umhverfið er fagurt“ sagði Grímur í spjalli við 641.is í dag.

 

 

 

 

Í stuttu máli fjallar kvikmyndin um þá bræður Gumma og Kidda sem eru sauðfjárbændur á sjötugsaldri. Þeir  búa hlið við hlið í afskekktum dal og hrútar frá þeim þykja með þeim bestu á landinu. En þeir bræður hafa ekki talast við í fjóra áratugi. Dag einn greinist riðuveiki hjá Kidda og í kjölfarið neyðast þeir Gummi og Kiddi til þess að hefja samskipti á ný eftir 40 ár.

Myndin verður væntanlega frumsýnd árið 2015.