Gott sparisjóðaár – 52 milljóna hagnaður hjá Sparisjóði Suður-Þingeyinga

0
393
Baldvin Áslaugsson (fyrir miðju) tekur við styrknum fyrir hönd Matarskemmunar. Með honum á myndinni eru Reinhard Reynisson varaformaður stjórnar sparisjóðsins og Gerður Sigtryggsdóttir sparisjóðsstjóri.

Aðalfundur Sparisjóðs Suður-Þingeyinga var haldinn í Ljósvetningabúð 17. apríl sl. Fundurinn var vel sóttur og mættu um 60 stofnfjáreigendur til fundar. Fram kom að rekstur sparisjóðsins gekk vel á liðnu starfsári. Hagnaður af rekstri eftir skatta var 52 milljónir sem er um 8% ávöxtun eigin fjár.  Innlán sparisjóðsins jukust á árinu um 20% og útlán um 28%.

Á árinu lauk stofnfjáraukningu sem hófst á árinu 2016. Í stofnfjáreigendahópinn bættust yfir 100 nýir stofnfjáreigendur og eru stofnfjáreigendur nú um 375. Sparisjóðurinn getur því með réttu talist fjöldahreyfing fólksins.

Sparisjóður Suður-Þingeyinga  glímir eins og önnur fjármálafyrirtæki við háar og kostnaðarsamar eiginfjárkröfur sem fara hækkandi og stefnir í að CAD eiginfjárkrafan verði  19,19% í ársbyrjun 2020. Til samanburðar má nefna að sambærileg eiginfjárkrafa  á sparisjóðinn var 8% árið 2008 og stóð sjóðurinn þó af sér hrunið.

Á liðnu starfsári veitti sjóðurinn um 3,5 milljónum til samfélagslegra verkefna á starfssvæði sínu. Á aðalfundinum  var Matarskemmunni ehf á Laugum veittur styrkur að upphæð kr  1.000.000- til eflingar heimavinnslu matvæla í héraði.

Afgreiðslustöðvar sparisjóðsins eru þrjár, á Laugum, Húsavík og  Reykjahlíð. Sparisjóðsstjóri er Gerður Sigtryggsdóttir.