Körfuboltalið Þórs á Akureyri varð deildarmeistari í 1. deild nú nýlega þegar liðið vann ÍA örugglega í sínum lokaleik 107-74 á Akureyri. Bárðdælingurinn Tryggvi Snær Hlinason úr Svartárkoti hefur spilað mjög vel með liði Þórs í vetur og var hann, fyrir leikinn gegn ÍA, þriðji stigahæsti leikmaður liðsins með 13,2 stig skoruð að meðaltali og tók Tryggvi auk þess 8,9 fráköst að meðaltali í hverjum leik í vetur.
Vakti það sérstaka athygli áhorfenda á leiknum gegn ÍA að Pétur Guðmundsson, fyrrverandi landsliðsmiðherji í körfuknattleik og fyrrverandi leikmaður í NBA, fylgdist grannt með leik Þórs og ÍA og þá sérstaklega með Tryggva Snæ. Haft er eftir Pétri Guðmundssyni á mbl.is að Tryggvi sé geysilega efnilegur. “Hann skilur leikinn ótrúlega vel miðað við að hafa æft körfubolta í tvö ár og hefur sýnt ótrúlegar framfarir á svona stuttum tíma“.
Pétur skoðaði myndbandsupptöku með tilþrifum Tryggva úr viðureign Þórs og KR frá því í vetur og trúði vart eigin augum.
„Þetta video hefur farið mjög víða og ég veit að margir þjálfarar í Bandaríkjunum hafa horft á það,“ bætti Pétur við.
Fram kemur í fréttinni að Pétur hefur áhuga fyrir því að Tryggvi fari sem fyrst til Bandaríkjanna til náms og til að spila körfubolta og sleppi því að spila með Þórsliðinu í úrvalsdeildinni næsta vetur.
641.is náði tali af Tryggva Snæ í dag og spurði hann hvort hann væri að leiðinni til Bandaríkjanna strax á þessu ári. Að sögn Tryggva Snæs hefur hann tekið ákvörðun um að bíða með að fara til Bandaríkjanna því hann vill spila með Þór í úrvalsdeildinni næsta tímabil. Eftir það kæmi dvöl í Bandaríkjunum vel til greina.
Keppnistímabilið hjá Þór er nú búið en þá taka við U-20 ára landsliðsverkefni hjá Tryggva. Hann reiknaði með því að spila með liðinu í norðurlandamóti á næstunni og svo sennilega á EM U-20 ára landsliða líka.
Hér fyrir neðan má skoða tilþrif Trygga gegn KR í vetur. (Tryggvi er í treyju númer 15)
