Framsýn ályktar um löggæslumál og atvinnumál

0
17

Ályktun um löggæslumál. Framsýn, stéttarfélag skorar á innanríkisráðherra að bregðast við áhyggjum Þingeyinga er varðar löggæslumál á svæðinu. Það verður best gert með því að auka framlög til löggæslumála þegar í stað.  Að mati Framsýnar er löggæsla í umdæminu undir öllum eðlilegum öryggiskröfum sem skapað hefur óöryggi meðal íbúa og fjölmargra ferðamanna sem leggja leið sína í Þingeyjarsýslur á hverju ári.

1317204445-framsyn

Þá eru lögreglumenn undir miklu vinnuálagi í sínum daglegu og krefjandi störfum. Framsýn er umhugað um velferð lögreglumanna og gerir því alvarlegar athugasemdir við þeirra starfsskilyrði. Lögreglumenn eiga til dæmis ekki að þurfa standa einir á vakt í stórum umdæmum sbr. umdæmi lögreglunar á Húsavík. Vinnuumhverfi lögreglumanna er vinnuveitandanum ekki til sóma, það er ríkinu. Framsýn krefst þess að þegar í stað verði gripið til aðgerða til að tryggja eðlilega löggæslu í umdæmi lögreglunar á Húsavík með auknum framlögum til löggæslumála.

Söguleg mynd. Það er ekki á hverjum degi sem maður nær mynd að tveimur lögreglumönnum á vakt í umdæmi lögreglunnar á Húsavík. Vegna niðurskurðar eru þeir oft einir á vakt. Mynd af vefnum Framsyn.is
Söguleg mynd. Það er ekki á hverjum degi sem maður nær mynd að tveimur lögreglumönnum á vakt í umdæmi lögreglunnar á Húsavík. Vegna niðurskurðar eru þeir oft einir á vakt. Mynd af vefnum Framsyn.is

 

 

 

 

 

 

 

 

 

 

Ályktun um atvinnumál 

“Framsýn stéttarfélag hvetur Alþingi til að ljúka þeim mikilvægu málum sem liggja fyrir þinginu og varða m.a. uppbygginu kísilvers á Bakka við Húsavík.

Um er að ræða tvö frumvörp sem Steingrímur J. Sigfússon atvinnuvega- og nýsköpunarráðherra  hefur lagt fram og varða annars vegar heimild til að gera fjárfestingarsamning um byggingu kísilvers á Bakka og hins vegar um uppbyggingu tiltekinna innviða sem er nauðsynleg forsenda verkefnisins, einkum vegtengingu milli hafnarinnar og iðnaðarsvæðisins á Bakka og stækkun Húsavíkurhafnar.

Það er von Framsýnar að Alþingi beri gæfa til að klára málið og stígi þannig veigamikið skref í uppbyggingu nýs iðnaðarsvæðis á Norðurlandi, þjóðinni allri til heilla.”  Framsýn.is