Fagna olíuleit á Drekasvæðinu

0
22

Stjórn og trúnaðarmannaráð Framsýnar kom saman til fundar í fyrrakvöld. Á fundinum var ályktað um olíuleit á Drekasvæðinu þar sem því er fagnað sérstaklega að til standi að ráðast í leit og rannsóknir á vinnslu olíu og gasi á Drekasvæðinu. Sjá frekar á heimasíðu félagsins. Ályktunin er svohljóðandi:

1317204445-framsyn

„Framsýn, stéttarfélag fagnar ákvörðunum sem miða að því að hefja leit og rannsóknir á vinnslu olíu og gasi á Drekasvæðinu við Jan Mayen-hrygg innan íslensku lögsögunnar.
Umsvifin sem framundan eru á Drekasvæðinu kalla á mikla þjónustu í landi.Landfræðilega er ljóst að sú uppbygging kemur til með að verða á Norðausturlandi.
Framsýn leggur til að stjórnvöld beiti sér fyrir því að þjónustumiðstöð fyrir olíuleit, tengdar rannsóknir og síðar mögulega olíuvinnslu á Drekasvæðinu rísi á Raufarhöfn með tengingu til Húsavíkur og Þórshafnar.

Lega Raufarhafnar, góð hafnaraðstaða og gott landrými gerir svæðið ákjósanlegt fyrir starfsemina. Þá er stutt í öfluga þjónustu og góðar flugsamgöngur á Húsavík við Reykjavík. Fyrir liggur að Raufarhöfn hefur átt undir högg að sækja og því yrði kærkomið fyrir svæðið að þessi þekkti gamli síldarbær verði miðstöð leitar og rannsókna á olíu í landhelgi Íslendinga.“

Sambandsleysi stjórnvalda og ASÍ óþolandi

Stjórn og trúnaðarmannaráð Framsýnar sem jafnframt er samninganefnd félagsins kom saman til fundar í gær til að ræða forsendur gildandi kjarasamninga. Að mati félagsins eru forsendurnar löngu brostnar og því blasir við uppsögn samninga nema Samtök atvinnulífsins og stjórnvöld sýni ábyrgð og komi til móts við kröfur verkalýðshreyfingarinnar um breytingar á gildandi kjarasamningum. Þá liggur fyrir að stjórnvöld verða að koma að málinu með aðgerðum. Framsýn telur því ólíðandi að Alþýðusambandið hafi slitið samstarfi við stjórnvöld. Það sé ekki leiðin til að skapa stöðuleika
í þjóðfélaginu sem sé verkafólki sérstaklega mikilvægur um þessar mundir.Fundurinn taldi mikilvægt að álykta um málið.

Ályktun um stöðu kjaramála

„Í ljósi stöðunnar sem liggur fyrir, það er að forsendur gildandi kjarasamninga séu brostnar, telur Framsýn- stéttarfélag mikilvægt að viðsemjendur og stjórnvöld leiti allra leiða til að koma í veg fyrir að þeir falli úr gildi í lok janúar.

Leiðin til þess er að atvinnurekendur komi til móts við verkalýðshreyfinguna og hækki laun umfram 3,25% umsamdar launahækkanir 1. febrúar. Jafnframt því sem stöðuleiki verði skapaður í þjóðfélaginu með aðkomu stjórnvalda.
Launþegar hafa ekkert að gera með launahækkanir sem fara beint út í verðlagið með hækkandi verðbólgu. Það er að pissa í skóinn sinn.

Framsýn hvetur Alþýðusamband Íslands til að leita allra leiða til sættast við núverandi stjórnvöld. Forsendan fyrir því að hægt verði að bæta stöðu félagsmanna Alþýðusambandsins er ekki síst gott samstarf við stjórnvöld á hverjum tíma. Það þjónar ekki hagsmunum verkafólks að stjórnvöld og ASÍ tali ekki saman um málefni er snerta alþýðu landsins, það kennir sagan okkur.“   Framsýn.is