Er ekki komið nóg ?

0
36

Það hefur alltaf verið góður siður að sjást fyrir, en ég er ekki viss um að allir skilji merkingu þessarar setningar. Minn málskilningur segir mér að merkingin sé sú að vita áður en maður heldur af stað hvar maður ætlar að enda og hverra erinda maður endar þar.

Árni Pétur Hilmarsson.
Árni Pétur Hilmarsson.

 

Það að vera partur af samfélagi er okkur öllum mikilvægt. Samfélög eru mismunandi og ég trúi því að það sé eitthvað gott í öllum samfélögum. Nú hef ég búið og verið þátttakandi í þó nokkrum samfélögum á Íslandi og upplifað mikinn mun. Mín upplifun hefur m.a. verið að eftir því sem samfélagið er minna því virkari er samfélagsþátttaka íbúanna enda skiptast samfélagsleg verkefni á færri hendur.

 

 

Niðurrif er alltaf einfaldara en uppbygging, þú ert fljótari að rífa niður hús en að byggja það og það er líka svo mikið einfaldara og krefst minni sérþekkingar að brjóta niður hús heldur en að byggja þau. En sennilega taka allavega jafnmargir ef ekki fleiri eftir þeim sem brjóta hús en þeim sem þau byggja.

Ég skal viðurkenna það að mér finnst sárt að sjá það samfélag sem ég bý í og er þátttakandi í troðið ofan í svaðið, það að lesa það ítrekað á samfélagsmiðlum að eitthvað mikið sé að í okkar ágæta samfélagi finnst mér ekki réttmætt og vont að þurfa að sitja undir. Ég trúi því að ég búi í góðu samfélagi og það er að hluta til ástæða þess að ég kýs að búa hér. Lítil samfélög hafa bæði kosti og galla, ég trúi því að kostirnir séu fleiri en gallarnir. Ég upplifi okkar samfélag þannig að allir eru fljótir að rétta hjálparhönd þegar eitthvað bjátar á, hér hefur fólk samkennd hvert með öðru og hjálpast að.

Auðvitað er okkar samfélag ekki fullkomið frekar en önnur og fólki getur orðið á í ýmsu án þess að þar liggi einhverjar annarlegar hvatir að baki. Við eigum dómsstóla til þess að leggja mál í dóm ef okkur finnst á okkur brotið, við þurfum ekki endilega að vera sátt við eða sammála þeim dómum sem falla en við verðum að hlíta þeim.

Ég trúi því að hjá sveitarfélaginu starfi gott fólk sem leysir sín verkefni af samviskusemi og kostgæfni. Það er erfitt fyrir starfsmenn sveitarfélagsins að sitja undir því hafa ekki unnið sín störf vel og látið að því liggja að það séu fjölskyldu- og vinatengsl sem ráði för í ákvörðunartöku. Eða þá að á einstökum vinnustöðum vinni bara vont fólk sem ekki kann framkomu né mannasiði enda partur af einhverjum ættarveldum. Þetta er rógburður og dylgjur. Gagnrýni á alltaf rétt á sér, en það er ekki sama hvernig hún er sett fram. Ef eitthvað er í raun og veru að, þá eiga þau mál að fara réttar leiðir en ekki í gegnum fjölmiðla enda gerir sú leið ekki annað en að gera okkar ágæta samfélag tortryggilegt og valda íbúum þess hugarangi og sárinum.

Stjórnsýsla sveitarfélaga er þannig uppsett að efsta vald sveitafélags er sveitarstjórn, sem gerir það að verkum að vald hvers sveitarstjórnarfulltrúa er mikið. Það má segja að hver sveitarstjórnarfulltrúi hafi 1/7 vald í sveitarfélaginu. Sveitarstjórnarfulltrúar eiga rétt og í raun og veru skyldu samkvæmt lögum að leggja fram tillögur til þess að bæta það sem þeir telja miður í stjórnsýslunni. Ég veit ekki til þess að nein tillaga hafi komið fram á þessu kjörtímabili um einhverskonar betrumbót á stjórnsýslu sveitarfélagsins.

Það að gera ráðningar tortryggilegar er í raun einfalt. Þegar umsækjendur eru fleiri heldur en stöðurnar sem í boði eru þá situr einhver eftir með sárt ennið og þá er svo auðvelt að sá fræjum tortryggni ,,þessi fékk örugglega bara vinnuna vegna þess að hann þekkir þennan“. Það er alltaf svo að einhver rökstuðningur liggur fyrir því hverjir fá stöður og hverjum er hafnað. Það eru hinsvegar upplýsingar sem eiga ekkert erindi fyrir almannasjónir, það eru upplýsingar sem gildir trúnaður um á milli atvinnurekenda og umsækjenda. Ef umsækjendur telja á sér brotið þá eiga þeir þann sjálfsagða rétt að leita réttar síns og leggja mál sitt í dóm.

Facebook og aðrir samfélagsmiðlar eru dásamleg tæki. Þessir miðlar gera okkur kleift að halda sambandi við fólk sem við alla jafna myndum ekki halda sambandi við, fylgjast með vinum og ættingum og deila með öðrum því sem okkur langar til að deila. En mér finnst oft margir ekki leggja nógu mikla hugsun í hvað þeir láta frá sér, átta sig ekki á að þegar þeir „like-a“ á greinar og fréttir sem fjalla á neikvæðan hátt um fólk þá eru þeir að særa einhvern. Svo ég tali nú ekki um þegar fólk kemur með athugasemdir (comment) á slík mál án þess að geta mögulega vitað alla málavöxtu eða gert sér raunsanna mynd af málinu. Hafa bara eina hlið.

Verum góð hvert við annað.

Njótum þess að búa saman í góðu samfélagi.

Árni Pétur Hilmarsson

Sveitarstjórnarfulltrúi

Aðstoðarskólastjóri við Þingeyjarskóla

Íbúi í Þingeyjarsveit.