Tólf ára tímabil ríkisstjórnar Sjálfstæðis- og Framsóknarflokks var samfellt niðurlægingartímabil fyrir landsbyggðina. Fólksflutningar til suð-vestur hornsins í kjölfar fækkunar starfa og starfsmöguleika vítt og breytt um landið sogaði kraftinn hægt og bítandi úr landbyggðinni og veikti stöðu hennar frá því sem var. Þetta á ekki síst við um Húsavík og þau sveitarfélög sem nú mynda Norðurþing.
Látlaus fólksflótti af svæðinu var ekki merki um að fólk vildi ekki búa á svæðinu, að mannlífið væri ekki gott eða það hefði ekki upp á að bjóða möguleika til sómasamlegs lífviðurværis af náttúrunnar hendi. Heldur betur ekki. Hnignun atvinnulífsins og fækkun íbúa var mannanna verk, afleiðing pólitískrar vangetu í bland við pólitísk markmið stjórnarflokka þeirra tíma. Fátt, ef nokkuð, var gert til varnar fækkandi atvinnutækifærum með tilheyrandi fólksfækkun í Norðurþingi á þeim tíma.
Það vantaði þó ekki að gefnar væru vonir og byggðar upp væntingar sem menn höfðu svo hvorki burði í sér eða getu til að láta rætast. Þessir tveir gömlu flokkar, Sjálfstæðis- og Framsóknarflokkur, skilja ekkert eftir sig í Norðurþingi nema brostnar vonir og pólitísk svik við samfélagið.
Það er fyrst núna, eftir mörg mögur ár, sem sér orðið til sólar og viðsnúningur verður í atvinnumálum á svæðinu. Undir forystu Vinstri grænna í ríkisstjórn hefur nú verið lagt af stað í stórfellda uppbyggingu atvinnulífs í Norðurþingi. Í kjölfar samninga við þýska fyrirtækið PCC, auk lagasetningar um uppbyggingu innviða í sveitarfélaginu upp á milljarða króna, er hafin ný og löngu tímabær sókn í atvinnumálum á svæðinu. Mörg hundruð störf munu verða til á framkvæmdatímanum og vel á annað hundrað störf til frambúðar. Bæjarstjórn Norðurþings, með bæjarstjórann í broddi fylkingar, hefur haldið vel á málinu af hálfu sveitarfélagsins. Afrakstur af góðu samstarfi þeirra og atvinnuvega- og nýsköpunarráðuneytisins hefur nú skilað íbúum Norðurþings og landsmönnum öllum, þeim árangri sem nú blasir við.
Undir forystu og á ábyrgð ráðherra og þingmanna Vinstri grænna er atvinnuuppbygging loksins að hefjast á Bakka við Húsavík. Eftir mörg mögur ár sinnu- og afskiptaleysis stjórnvalda fyrir atvinnulífinu á landsbyggðinni hefur tekist að snúa vörn í sókn.
Þó fyrr hefði verið!
Björn Valur Gíslason Varaformaður Vinstri grænna
