Beinar rútuferðir milli Keflavíkurflugvallar og Akureyrar næsta vor

0
73

Ferðaþjónustufyrirtækið Gray Line hefur ákveðið að hefja beinar áætlunarferðir milli Akureyrar og Keflavíkurflugvallar næsta vor. Í apríl og maí verður ekið þrisvar í viku en daglega yfir sumarið fram í miðjan september. Áætlun Gray Line Airport Express verður með þeim hætti að brottför verður frá Keflavík kl. 17:00, komið til Akureyrar um kl. 23:00. Þaðan verður haldið kl. 23:15 og komið til Keflavíkur kl. 05:15. Flugfarþegar sem koma til landsins síðdegis komast þannig norður fyrir miðnætti og farþegar að norðan komast beint í morgunflug.

Rúta frá Grey Line
Rúta frá Grey Line

Á leiðinni verður stoppað fyrir farþega í Borgarnesi, Staðarskála, Blönduósi og Varmahlíð. Fargjald aðra leið verður 11.000 milli Akureyrar og Keflavíkur, Varmahlíð 10.000 kr., Blönduós 9.000 kr., Staðarskáli 7.000 kr. og Borgarnes 4.500 kr. Gray Line leggur áherslu á að ferðalagið verði þægilegt og ánægjulegt og verða eingöngu lúxusrútur úr flota fyrirtækisins notaðar á leiðinni. Þær eru með salernum og veitingaaðstöðu ásamt internetteningu og tveir bílstjórar verða ávallt með í för til að tryggja gæði þjónustunnar.

 

 

„Þessi Airport Express áætlun þýðir að farþegar geta verið komnir til Akureyrar fyrir miðnætti sama dag og þeir lenda. Á sama hátt geta þeir sem koma að norðan náð morgunflugi frá Keflavíkurflugvelli og sparað sér þannig að fara suður daginn áður,“ segir segir Þórir Garðarsson, framkvæmda­stjóri sölu- og markaðssviðs Gray Line.

Fyrsta ferðin verður farin sunnudaginn 3. apríl 2016. Í apríl og maí verður ekið á þriðjudögum, fimmtudögum og sunnudögum, og síðan daglega yfir sumarið.

Rútan að innan
Rútan að innan

Við fögnum þessum nýja valkosti í samgöngum fyrir Norðurland og hvetjum alla til að kynna ferðirnar vel fyrir sínum samstarfsaðilum. Verkefnið getur skilað okkur fjölgun ferðamanna þar sem nú er komið til móts við kröfur erlendra ferðamanna um einfaldari og þægilegri valkost í ferðalögum frá Keflavík til Akureyrar. Góð stopp á leiðinni tryggja síðan dreifingu um Norðurland vestra sem er ánægjulegt að sjá og skapar ný tækifæri fyrir svæðið. Auk þess er hér auðvitað um að ræða góðan valkost fyrir heimamenn sem eru á leið erlendis og geta nú tekið næturrútuna suður eða seinnipartsferðina heim aftur, segir í fréttatilkynningu frá Markaðsstofu Norðurlands.