Bambi frá Dæli er besta nautið sem var fætt árið 2008

0
53
Besta naut Nautastöðvar Bænda­samtaka Íslands, sem fætt er árið 2008, var útnefnt á aðalfundi Landssambands kúabænda þann 31. mars síðastliðinn í upphafi fagþings nautgriparæktarinnar. Nautið Bambi (08049) hlaut þessa útnefningu. Veitti Guðmundur Jóhannesson, ábyrgðarmaður í nautgriparækt hjá Ráðgjafarmiðstöð landbúnaðarins, ræktendunum Margréti Bjarnadóttur og Geir Árdal frá Dæli í Fnjóskadal viðurkenningu af þessu tilefni. Frá þessu segir á vef Bændablaðsins.
Bambi. Mynd af vef Bændablaðsins
Bambi. Mynd af vef Bændablaðsins
Í rökstuðningi Guðmundar kom fram að í framættum Bamba væri að finna mikilvæg naut í íslenskri nautgriparækt, eins og til dæmis Smell (92028), Daða (87003) Þráð (86013), Bauta (79009), Víði (76004), Yl 74010, Fáfni (69003), Bakka (69002) og Sokka (59018).
Faðir Bamba er Laski (00010) frá Dalbæ í Hrunamannahreppi og móðir Stáss (319). Kaðall (94017), frá Miklagarði í Saurbæ er móðurfaðir. Guðmundur sagði að kynbótaeinkunn Bamba væri einstök, eða 117.