Andvari vígður á morgun og fyrsta skóflustungan að Sjóböðunum tekin

0
126

Á morgun, þriðjudaginn 13. september, verður Andvari ÞH 1438, nýjasti rafbátur Norðursiglingar, formlega vígður á Húsavík. Ragnheiður Elín Árnadóttir, iðnaðar- og viðskiptaráðherra, verður viðstödd athöfnina og mun flytja ávarp. Einnig verður fyrsta skóflustunga tekin að Sjóböðunum á Húsavíkurhöfða.

Andvari. Mynd: Hafþór Hreiðarsson
Andvari. Mynd: Hafþór Hreiðarsson

 

Dagskrá:

kl. 16.00

Fyrsta skóflustunga að Sjóböðunum á Húsavíkurhöfða.

kl. 16.30

Vígsla Andvara við Húsavíkurhöfn.

Ávörp flytja:

  • Guðbjartur Ellert Jónsson, framkvæmdastjóri Norðursiglingar.
  • Ragnheiður Elín Árnadóttir, iðnaðar- og viðskiptaráðherra.
  • Kristján Þór Magnússon, hafnar- og sveitarstjóri Norðurþings.

Að vígslu lokinni verður boðið upp á léttar veitingar á Hvalbaki.

Stórt skref í átt að rafvæðingu flotans

Andvari er annar báturinn í flota Norðursiglingar sem hefur verið rafvæddur og hefur fyrirtækið því stigið stórt skref í átt að fullri rafvæðingu flotans.

Síðustu vikur hefur Andvari siglt með farþega í hvalaskoðun á Skjálfanda og óhætt að segja að upplifun þeirra hafi verið jákvæð enda er þessi einstaklega umhverfisvæni bátur algjörlega hljóðlaus sem gerir hvalaskoðun og náttúruupplifun við Skjálfanda enn ríkari og betri fyrir gesti.