Aðalfundur Sparisjóðs Suður-Þingeyinga – Rekstrahagnaður 34 milljónir

0
82

Aðalfundur Sparisjóðs Suður-Þingeyinga var haldinn á Breiðumýri  5. maí sl. Rekstur sparisjóðsins gekk vel á árinu 2015 og var rekstrarhagnaður rúmar 34 mkr. Viðskiptavinum sjóðsins fjölgaði umtalsvert á árinu, enda virðist aukinn áhugi vera á fjármálastarfsemi sem byggir fremur á samfélagslegum forsendum en hámarks ávöxtun eigin fjár. Á fundinum var samþykkt  að auka stofnfé sparisjóðsins um allt að 140 mkr og gert ráð fyrir að bjóða nýjum  stofnfjáreigendum helming þess fjár. Núverandi stofnfjárhafar sem eru um 250 hafa hins vegar forkaupsrétt að allt að 70 mkr.

Sigurður Skúlason, Elín S Karlsdóttir, Mjöll Matthíasdóttir og Ari Teitsson
Sigurður Skúlason, Elín S Karlsdóttir, Mjöll Matthíasdóttir og Ari Teitsson

Sparisjóðurinn hefur á undanförnum árum veitt sérstaka styrki til málefna sem  styrkja innviði samfélagsins, eins og samþykktir hans segja til um.  Að þessu sinn voru veittir tveir styrkir að upphæð kr. 500.000 hvor. Styrkina hlutu Hafdís Sigurðardóttir frjálsíþróttakona úr Þingeyjarsveit og Kvenfélagasamband Suður-Þingeyinga til endurbóta á Húsmæðraskólanum á Laugum, sem er í eigu sambandsins. Mjöll Matthíasdóttir tók við styrknum fyrir hönd Kvenfélagsambandsins og Sigurður og Elín foreldrar Hafdísar, veittu styrknum viðtöku fyrir hennar hönd.

 

Stjórn sparisjóðsins skipa nú:  Ari Teitsson Hrísum, Helgi Héðinsson Geiteyjarströnd, Kolbrún Ulfsdóttir Rauðuskriðu, Margrét Hólm Valsdóttir Húsavík og Reinhard Reynisson Húsavík.