Nærri 60 manns hafa nú lokið byrjendanámskeiði í bogfimi á vegum Ungmennafélagsins Eflingar í Reykjadal. Leiðbeinandi á námskeiðunum er Guðmundur Smári Gunnarsson, Íslandsmeistari í greininni og er hann er búsettur á Laugum. Mikill og góður árangur náðist strax á fyrsta starfsári bogfimideildarinnar. Efling á ríkjandi Íslandsmeistara í opnum flokki bæði innan- og utanhúss. Þetta og fleira kom fram í erindi Guðmundar sem hann hélt í Dalakofanum á Laugum í gærkvöld, sem fjallaði um bogfimi sem íþrótt og fyrsta starfsár bogfimideildar Ungmennafélags Eflingar í Reykjadal.
Bogfimi er ævagömul iðja og voru bogar notaðar í bardögum og við veiðar. Sögu bogfimi má rekja allt að 10 þúsund ár aftur í tímann. Allmargar þjóðir lærðu að beita boga á hestbaki. Bogar urðu ekki eins mikilvægir sem vopn og veiðitæki eftir að púðrið var fundið upp í Kína í kringum árið 1000. Í byrjun 20. aldar fengu verkfræðingar í USA áhuga á eiginleikum boga. Bogfimi sem íþrótt nú á dögum má rekja til þess.
Árið 1974 voru fyrstu skipulögðu æfingarnar í bogfimi á Íslandi. Upphafið var hjá Íþróttafélagi Fatlaðra í Reykjavík. Ungmennafélagið Efling í Reykjadal er nú eitt af 6-7 félögum á Íslandi sem býður uppá æfingar í bogfimi, en þar eru iðkendur nú 13. Bogfimideild Eflingar var stofnuð 6. mars árið 2012. Þorsteinn Aðalsteinson, Fellshlíð í Reykjadal, er Íslandsmeistari innanhúss og Guðmundur Smári Gunnarsson, Laugum, utanhúss. Efling á einnig Íslandsmeistara í unglingaflokki – bæði innan- og utanhúss. Það er Ásgeir Ingi Unnsteinsson frá Narfastöðum í Reykjadal, sem vann báða þá titla í ár.
Guðmundur sagði á fundinum frá tegundum boga og sýndi nútímaboga sem notaðir eru í keppni. Greindi frá formi á keppnum, stigaskori o.fl. Útskýrði m.a. gang mála í úrslitakeppni bogifmi á Olympíuleikunum í London 2012 um leið og horft var á myndband af þeim viðburði.
