138,4 milljóna kr. hagnaður hjá Norðlenska 2013

0
25

Rekstur Norðlenska matborðsins ehf. gekk ágætlega síðastliðið ár og var ársvelta félagsins tæpir 5,2 milljarðar króna. Það er veltuaukning um rúm 9,8% á milli ára. Hagnaður ársins var 138,4 milljónir króna og er eigið fé Norðlenska nú 631,9 milljónir króna og eiginfjárhlutfallið 19,2%. Á aðalfundi félagsins 28. febrúar síðastliðinn var samþykkt að greiða eigandanum, Búsæld ehf., félagi 525 bænda, arð að upphæð 15 milljónum króna. Frá þessu segir á nordlenska.is

Nordlenska22

 

 

 

·    Hagnaður ársins var 138,4 milljónir kr., en 2012 var hagnaður félagsins 188,5 m. kr.

·    Ársveltan var rúmar 5.152,3 m. kr. og jókst um rúm 9,8% á milli ára.

·    Hagnaður ársins fyrir afskriftir og fjármagnsliði, EBITDA hagnaður, var 283,2 m. kr. samanborið við 325,4 m. kr. árið 2012.

·    Heildar eignir Norðlenska voru í árslok  3.290,4 milljónir kr.

·    Eigið fé í árslok var 631,9 milljónir kr. og er eiginfjárhlutfallið nú 19,2% en eigið fé var 508,4 milljónir í lok árs 2012.

·    Veltufjárhlutfall var í árslok 1,39.

Hagnaður ársins, 138,4 milljónir kr. er m.a. til kominn vegna sterkrar stöðu Norðlenska á innanlandsmarkaði, en vörur og vörumerki Norðlenska njóta mikilla vinsælda hjá neytendum, auk þess var reksturinn í góðu jafnvægi og er ljóst að eigendur og starfsfólk geta verið stolt af góðu og öflugu fyrirtæki.

Að sögn Sigmundar Ófeigssonar, framkvæmdastjóra Norðlenska, var reksturinn í góðu jafnvægi og sala gekk vel á vörum Norðlenska innanlands sem utan. Þegar leið á árið dró heldur úr eftirspurn, sérstaklega á lambakjöti og grísakjöti. Útflutt magn var mjög sambærilegt við síðastliðin ár en afkoman þó heldur lakari vegna styrkingar íslensku krónunnar. Verð fyrir hinar ýmsu aukaafurðir var hins vegar mjög gott á árinu. Norðlenska hefur lagt aukna áherslu á að fullnýta sláturgripi, aukaafurðir eru allar fluttar út og skiluðu þau viðskipti viðunandi hagnaði.

Hjá Norðlenska sem er með starfstöðvar á Akureyri, Húsavík, Höfn og í Reykjavík starfa rúmlega 180 starfsmenn og í sauðfjársláturtíð fjölgar þeim um 140 og er þá heildar starfsmannafjöldi rúmlega 320.

Stjórn Norðlenska er óbreytt að loknum aðalfundi, skipuð eftirtöldum:

Heiðrún Jónsdóttir, Garðabæ, stjórnarformaður, Ingvi Stefánsson, Teigi, varaformaður, Geir Árdal, Dæli, ritari, Aðalsteinn Jónsson,  Klausturseli, meðstjórnandi, Sigríður Elín Sigfúsdóttir, Reykjavík, meðstjórnandi.

Varamenn eru: Óskar Gunnarsson, Dæli Skíðadal, Gróa Jóhannsdóttir, Hlíðarenda og Jón Benediktsson, Auðnum.