Á dögunum var Björgunarsveitinni Þingey færð að gjöf geisladiskar með harmonikkusveitinni  Strákabandið frá Húsavík, sem Björgunarsveitin ætlar að selja til fjáröflunar. Þetta eru annars vegar diskar sem heita, Ljúfu lögin og kom út 1999, þá voru í Strákabandinu þeir: Hákon Jónsson, Kjartan Jóhannesson, Jóel Friðbjörnsson, Kristján Kárason og Rúnar Hannesson. Undirleikarar voru Elvar Bragason gítar og söngur, Grímur Vilhjálmsson bassi, Haukur Pálmason trommur og Bylgja Steingrímsdóttir bakrödd. Um upptökur sá Kristján Edelstein. Þessi diskur hefur selst gríðarlega vel.

Hins vegar eru diskar sem komu út fyrir jólin 2011 og heita, Ljúfu lögin 2.
Þá voru í Strákabandinu Kjartan Jóhannesson, Jóel Friðbjörnsson, Kristján Kárason og Rúnar Hannesson. Undirleikarar eru Knútur Emil Jónsson bassi og gítar,Trausti Már Ingólfsson trommur og Aðalsteinn Júlíusson syngur ein lagið sem sungið er á diskinum, það er lagið, Á heimslóðum eftir Jóel og texti eftir Guðmund G Halldórsson.                      
Um upptökur og vinnslu sá Knútur Emil.

Það er Kjartan Jóhannesson sem gefur Björgunarsveitinni diskana, en Kjartan sem verður 87 ára á árinu, er hættur að spila með Strákabandinu. Þar sem diskarnir eru gjöf, fær Björgunarsveitin allan ágóðan af sölunni. Núna á næstunni munu Björgunarsveitarmenn fara um og selja diskana og bjóða þá einnig til sölu klósettpappír. Sveitungarnir eru vanir að taka vel á móti Björgunarsveitarmönnum og er ekki að efa að það verði eins núna.
 
  Kjartan Jóhannesson með Ljúfu lögin 2.


  Jón Ingi Sigurðsson tekur við diskunum, Ljúfu lögin og Ljúfu lögin 2.

Þorrablót Reykhverfinga var haldið nýlega í Heiðarbæ. Að venju var margt fólk og ýmislegt til 
skemmtunar.  Veislustjóri var Sigurður Illugason sem sá um fjöldasöng og kynnti hann einnig 
skemmtiatriðin og las upp auglýsingar. Víða var komið við og auk dans-og leikatriða söng 
Erla Bjarnadóttir frá Héðinshöfða gamanvísur. Allir skemmtu sér vel og var mikið dansað.


Litið var inn í kjötvinnslunni í Skarðaborg og bar þar ýmislegt til tíðinda. 


Farið var í bíltúr og ferðinni heitið á ball á Breiðumýri.


Það var kíkt út um glugga í sveitinni til þess að vita hvað væri að gerast í næstu húsum eða 
bæjum.


Stjórnarfundur var í kvenfélaginu.

Það var stundum hugur í bændum og tilfinningar réðu ferð.

Kótelettufélagið kom við sögu.
Texti:Atli Vigfússon
Myndir: Aðalheiður Þorgrímsdóttir 

Framsýn stéttarfélag hefur samþykkt að senda frá sér svohljóðandi ályktun um
Vaðlaheiðargöng, kallað er eftir málefnalegri umræðu um þessa mikilvægu
samgöngubót fyrir alla landsmenn:

 Ályktun um Vaðlaheiðargöng.


"Framsýn- stéttarfélag telur mikilvægt að framkvæmdir 
við Vaðlaheiðargöng hefjist hið fyrsta enda liggi fyrir 
fullnægjandi gögn um kostnað og rekstur ganganna.  
Fyrir liggur að framkvæmdin verður fjármögnuð með 
veggjöldum. Ljóst er að gerð ganganna skiptir gríðarlega miklu máli fyrir vegfarendur um þjóðveg 1, 
þjónustusvæðið við Eyjafjörð og atvinnuuppbyggingu í 
Þingeyjarsýslum.

Framsýn hvetur stjórnvöld til að standa við bakið á þeim aðilum sem standa að gerð 
ganganna og tryggja þar með framgang verksins. Þá gagnrýnir félagið þau öfl sem talaðhafa framkvæmdina niður með órökstuddum og óvönduðum málflutningi. 
Þess í stað kallar Framsýn eftir málefnalegum umræðum um þessa mikilvægu 
samgöngubót fyrir alla landsmenn."

Fréttatilkynning.